کاروبار
آئی ایم ایف ٹیکس ہدف میں 150 ارب روپے کمی پر راضی
اسلام آباد: آئی ایم ایف ٹیکس ہدف میں 150 ارب روپے کی کمی پر راضی ہوگیا، جس کے نتیجے میں عوام پر منی بجٹ کے خطرات فی الحال ٹل گئے ہیں۔
تفصیلات کے مطابق پاکستان اور عالمی مالیاتی فنڈ (IMF) کے درمیان حالیہ مذاکرات میں حکومت نے مؤقف اختیار کیا کہ نئے ٹیکس لگانے سے عوام پر بوجھ بڑھے گا، جس کے بعد آئی ایم ایف نے ٹیکس ہدف میں نرمی پر آمادگی ظاہر کر دی۔
ذرائع کے مطابق رواں مالی سال کے لیے ایف بی آر کا ٹیکس ہدف 14 ہزار 131 ارب روپے سے کم کر کے 13 ہزار 981 ارب روپے مقرر کرنے پر اتفاق ہوا ہے۔
پاکستان نے یہ رعایت سیلابی نقصانات اور اقتصادی دباؤ کے باعث مانگی تھی۔
ذرائع کا کہنا ہے کہ ایف بی آر کو مالی سال کی پہلی سہ ماہی میں 199 ارب روپے کے شارٹ فال کا سامنا رہا۔
آئی ایم ایف نے زور دیا کہ معیشت میں ٹیکسوں کا حصہ (ٹیکس ٹو جی ڈی پی ریشو) کم از کم 11 فیصد تک بڑھایا جائے، ورنہ مالی مشکلات میں اضافہ ہو سکتا ہے۔