head lines
پاکستان نیوی کا بحیرہ عرب میں 97 کروڑ ڈالر کا آپریشن
پاکستان نیوی نے ایک اور شاندار کامیابی حاصل کرتے ہوئے بحیرہ عرب میں 97 کروڑ ڈالر مالیت کی منشیات پکڑ کر عالمی سطح پر اپنی پیشہ ورانہ صلاحیتوں کا لوہا منوا لیا۔
کمبائنڈ میری ٹائم فورس کے مطابق دو مشتبہ کشتیوں سے برآمد شدہ منشیات کی مجموعی مالیت 97 کروڑ 20 لاکھ ڈالر سے زائد ہے۔ کارروائی کے دوران بڑی مقدار میں آئس اور کوکین برآمد کی گئی، جو تاریخ کی کامیاب ترین انسدادِ منشیات کارروائیوں میں شمار ہوتی ہے۔
امریکی سینٹرل کمانڈ (CENTCOM) نے بھی اس کامیاب آپریشن پر پاک بحریہ کو خراجِ تحسین پیش کیا۔ ان کے مطابق کارروائی سعودی قیادت میں قائم مشترکہ ٹاسک فورس 150 کے تحت پی این ایس یرموک (PNS Yarmook) نے انجام دی۔
سینٹ کام کے بیان کے مطابق صرف 48 گھنٹوں میں پاکستان نیوی نے دو کشتیوں سے دو ٹن کرسٹل میتھ، 350 کلوگرام آئس اور 50 کلوگرام کوکین برآمد کی، جن کی مجموعی مالیت تقریباً 97 کروڑ 24 لاکھ ڈالر ہے۔
سعودی رائل نیوی کے کمانڈر فہد الجوید نے بھی اس کارروائی کو عالمی تعاون اور پیشہ ورانہ ہم آہنگی کی بہترین مثال قرار دیا۔
پاکستان نیوی کی یہ کارکردگی ثابت کرتی ہے کہ پاکستان خطے میں منشیات کے خلاف جدوجہد میں ایک کلیدی کردار ادا کر رہا ہے اور عالمی امن کے لیے اپنے عزم پر قائم ہے۔