اریج فاطمہ حجاب پر تنقید کے جواب میں بول پڑیں

پاکستانی نژاد سابق اداکارہ اریج فاطمہ نے حال ہی میں اپنے حجاب کے حوالے سے ہونے والی تنقید پر کھل کر اظہارِ خیال کیا ہے۔ اریج فاطمہ نے کہا کہ وہ کسی دباؤ میں نہیں بلکہ اپنے دل کی آواز پر حجاب کرتی ہیں۔ ان کے مطابق، حجاب ان کا ذاتی فیصلہ ہے جس پر دوسروں کو رائے دینے کی ضرورت نہیں۔

اریج فاطمہ، جنہوں نے متعدد مشہور پاکستانی ڈراموں میں اداکاری کے جوہر دکھائے، شادی کے بعد امریکا منتقل ہو گئی تھیں۔ انہوں نے شوبز انڈسٹری کو اسلام کی خاطر خیرباد کہا اور اب اپنے شوہر ڈاکٹر اوزیر اور دو بیٹوں کے ساتھ پرسکون زندگی گزار رہی ہیں۔

چند ماہ قبل اداکارہ نے بتایا تھا کہ وہ باقاعدگی سے حجاب کرنا شروع کر چکی ہیں۔ اسی دوران انہوں نے اپنے کینسر کی تشخیص اور کامیاب علاج کے بارے میں بھی مداحوں کو آگاہ کیا، جس پر انہیں عوام کی جانب سے بے پناہ حوصلہ ملا۔ تاہم، حال ہی میں اریج فاطمہ نے انکشاف کیا کہ حجاب اختیار کرنے کے بعد انہیں غیر ضروری مشوروں اور تنقید کا سامنا ہے۔

انہوں نے کہا کہ جب وہ اسکارف نہیں لیتی تھیں تو زندگی آسان تھی، لیکن اب لوگ ہر وقت یہ بتانے کی کوشش کرتے ہیں کہ حجاب کے ساتھ کیا درست ہے اور کیا نہیں۔ اریج فاطمہ نے صاف الفاظ میں کہا کہ ان کا ایمان کا سفر ذاتی ہے، اور دوسروں کو چاہیے کہ وہ اسے قبول کریں اور رہنمائی کے نام پر تنقید سے گریز کریں۔