news
امریکی صدر ٹرمپ کی اپیل کے باوجود اسرائیل کا غزہ میں فضائی حملے جاری
امریکی صدر ٹرمپ کی سخت اپیلوں کے باوجود اسرائیل نے غزہ کی پٹی میں اپنی بمباری اور توپ خانے کی گولہ باری بند نہیں کی، جس کے نتیجے میں کم از کم 7 فلسطینی جاں بحق ہوگئے۔ عالمی نیوز ایجنسی الجزیرہ کی رپورٹ کے مطابق، حماس کی معاہدے پر رضامندی کے بعد بھی اسرائیل نے غزہ شہر اور مغربی پٹی کے دیگر علاقوں پر درجنوں فضائی حملے کیے۔
غزہ کی سول ڈیفنس ایجنسی کے ترجمان محمود بسال نے اے ایف پی کو بتایا کہ یہ رات انتہائی پرتشدد رہی، جس میں صدر ٹرمپ کی جانب سے بمباری روکنے کی اپیل کے باوجود اسرائیلی فورسز نے غزہ شہر پر مسلسل فضائی حملے کیے اور توپ خانے سے بھی گولہ باری کی۔ اس بمباری کے دوران کم از کم 20 گھر تباہ ہو گئے۔
غزہ سٹی کے بیپٹسٹ ہسپتال نے بتایا کہ تفح علاقے میں ایک گھر پر حملے کے بعد زخمیوں کو ہسپتال منتقل کیا گیا جہاں 4 افراد جاں بحق ہوئے اور متعدد زخمی ہوئے۔ اسی طرح خان یونس میں ناصر ہسپتال کے ترجمان نے تصدیق کی کہ بے گھر افراد کے کیمپ میں ڈرون حملے میں 2 بچے جاں بحق اور 8 زخمی ہو گئے۔
یہ صورتحال اس وقت پیدا ہوئی ہے جب عالمی برادری اور امریکہ جنگ بندی کے لیے زور دے رہے ہیں، مگر اسرائیل کی کارروائیاں جاری ہیں، جس سے فلسطینیوں کی حالت غیر مستحکم ہے۔