منور فاروقی کو قتل کرنے کی سازش ناکام

دہلی پولیس نے بھارت کے معروف اسٹینڈ اپ کامیڈین اور ریئلٹی شو بگ باس کے فاتح منور فاروقی کو قتل کرنے کی ایک بڑی سازش کو ناکام بنا دیا ہے۔ اس کارروائی کے دوران پولیس نے ایک مسلح جھڑپ کے بعد گولڈی برار گینگ سے تعلق رکھنے والے دو شوٹرز کو گرفتار کر لیا، جنہیں خاص طور پر منور فاروقی کو نشانہ بنانے کے لیے بھیجا گیا تھا۔

بھارتی میڈیا رپورٹس کے مطابق گرفتار ہونے والے ملزمان کی شناخت راہول اور ساحل کے ناموں سے ہوئی ہے۔ پولیس کے مطابق یہ دونوں ملزمان غیر ملکی گینگسٹر روہت گودارا کی ہدایت پر کام کر رہے تھے، اور یہ منصوبہ گولڈی برار اور ویرندر چران کے باہمی تعاون سے تیار کیا گیا تھا۔

تحقیقات سے یہ بھی پتا چلا ہے کہ دونوں شوٹرز نے پہلے ہی ممبئی اور بنگلورو میں منور فاروقی کی نقل و حرکت پر مکمل ریکی (نگرانی) کرلی تھی۔ پولیس کے ساتھ جھڑپ کے دوران راہول کو گولی لگنے سے زخمی حالت میں اسپتال منتقل کیا گیا ہے، جبکہ ساحل کو حراست میں لے کر تفتیش کی جا رہی ہے۔

راہول کے خلاف دسمبر 2024 میں ہریانہ میں ہونے والے تہرے قتل کے کیس کی بھی تفتیش جاری ہے، جو اس کے مجرمانہ ریکارڈ کو مزید سنگین بناتی ہے۔ دہلی پولیس کا کہنا ہے کہ گینگ کے دیگر ارکان کی گرفتاری کے لیے مزید چھاپے مارے جا رہے ہیں تاکہ کسی ممکنہ جانی نقصان سے قبل مکمل نیٹ ورک کو بے نقاب کیا جا سکے۔

منور فاروقی، جو بگ باس کے فاتح رہ چکے ہیں، انسٹاگرام پر 1 کروڑ 42 لاکھ سے زائد فالوورز کے ساتھ بھارت کے مقبول ترین کامیڈینز میں شمار ہوتے ہیں۔ ان کی شہرت میں بگ باس جیتنے کے بعد غیر معمولی اضافہ ہوا، جس کے بعد وہ ممکنہ طور پر مختلف شدت پسند گروہوں کی نظروں میں آ گئے۔