ندیم افضل چن کی مریم نواز پر تنقید

پیپلز پارٹی کے سینئر رہنما ندیم افضل چن نے وزیر اعلیٰ پنجاب مریم نواز کو شدید تنقید کا نشانہ بناتے ہوئے کہا ہے کہ وہ مودی کی زبان نہ بولیں اور پنجاب کارڈ کھیلنے سے گریز کریں۔ ندیم افضل چن کا کہنا تھا کہ کیا وہ اپنے ہی چچا (وزیر اعظم شہباز شریف) کی حکومت گرانا چاہتی ہیں؟ انہوں نے خبردار کیا کہ ایسی زبان ناقابل قبول ہے اور اس سے جمہوری عمل متاثر ہو سکتا ہے۔

دوسری جانب پیپلز پارٹی کی مرکزی ترجمان شازیہ مری نے پارلیمانی رپورٹرز ایسوسی ایشن (پی آر اے) کے انتخابات کے موقع پر پارلیمنٹ کا دورہ کیا اور صحافیوں سے اظہار یکجہتی کیا۔ انہوں نے پی آر اے کے جمہوری طرز عمل کی تعریف کرتے ہوئے کہا کہ الیکشن پراسیس شفاف اور قابلِ اعتماد ہونا چاہیے تاکہ تمام اسٹیک ہولڈرز کو اس پر اعتماد ہو۔ شازیہ مری کا کہنا تھا کہ شکایات الیکشن کا حصہ ہوتی ہیں، مگر ہماری جماعت پارلیمانی عمل کو جاری رکھنے کی حامی ہے۔ انہوں نے مزید کہا کہ آزادی رائے پر قدغن نہیں ہونی چاہیے اور سیاسی جماعتوں کو اپنے رویے پر نظرثانی کرنی چاہیے۔

انہوں نے سینئر صحافی اعجاز احمد کے ساتھ ایک سیاسی جماعت کی جانب سے روا رکھے گئے ناروا سلوک کی بھی مذمت کی اور واضح کیا کہ اگر پیپلز پارٹی کی جانب سے ایسا کچھ ہوتا تو فوری طور پر ڈسپلنری کارروائی کی جاتی۔ شازیہ مری نے سوشل میڈیا پر صحافیوں کو نشانہ بنانے کی روش پر تنقید کی اور کہا کہ سوشل میڈیا کو مثبت مقاصد کے لیے استعمال کیا جانا چاہیے۔ ان کا کہنا تھا کہ انتخابات کے عمل کو اتنا شفاف بنایا جانا چاہیے کہ کسی کو اعتراض نہ ہو اور سیاسی رویوں میں برداشت کا عنصر پیدا کیا جائے تاکہ جمہوری فضا قائم رہے۔