جے کے رولنگ کا ایما واٹسن اور ڈینیئل ریڈکلف پر شدید ردعمل

ہیری پوٹر سیریز کی معروف مصنفہ جے کے رولنگ نے اداکارہ ایما واٹسن اور اداکار ڈینیئل ریڈکلف کے خلاف سخت موقف اختیار کرتے ہوئے کہا ہے کہ وہ انہیں کبھی معاف نہیں کریں گی۔ جے کے رولنگ کا کہنا تھا کہ ان دونوں فنکاروں کی جانب سے کی گئی تنقید کے بعد انہیں جان سے مارنے، ریپ اور تشدد کی دھمکیاں موصول ہوئیں۔ یہ صورتحال اس وقت مزید سنگین ہو گئی جب ایما واٹسن نے ایک پوڈکاسٹ میں رولنگ سے تعلقات بہتر بنانے کی خواہش کا اظہار کیا۔ جواباً، رولنگ نے ایما کو “بے خبر” قرار دیا اور کہا کہ وہ شہرت و دولت میں پلی بڑھی ہیں، جبکہ انہوں نے خود غربت میں وہ کتاب لکھی جس نے ایما کو شہرت دلائی۔

رولنگ نے مزید وضاحت کی کہ ہر کسی کو اپنی رائے رکھنے کا حق حاصل ہے، لیکن جب ان کے بیانات پر کھلے عام تنقید کی گئی تو انہیں بھی اپنی رائے کا دفاع کرنے کا حق ہے، اور اب وہ اس حق کا استعمال کریں گی۔ یہ تنازعہ اس وقت شروع ہوا جب رولنگ نے ٹرانس جینڈر کمیونٹی کے حوالے سے متنازع بیانات دیے، جس کے بعد ہیری پوٹر فرنچائز کے مرکزی اداکاروں نے ان سے دوری اختیار کر لی اور ٹرانس رائٹس کی کھل کر حمایت کی۔ اس اختلاف نے مداحوں اور ناقدین کے درمیان ایک نئی بحث چھیڑ دی ہے، جو فنکاروں کی ذاتی رائے اور پیشہ ورانہ تعلقات کے بیچ توازن کے حوالے سے گہری ہوتی جا رہی ہے