وزیراعظم شہباز شریف کی صدر ٹرمپ کے 20 نکاتی غزہ جنگ بندی پلان کی حمایت

وزیراعظم شہباز شریف نے امریکی صدر ڈونلڈ ٹرمپ کے غزہ میں جنگ بندی کے لیے پیش کیے گئے 20 نکاتی منصوبے کی حمایت کرتے ہوئے اس اقدام کو قابلِ تحسین قرار دیا ہے۔ ایکس (سابقہ ٹوئٹر) پر اپنے بیان میں وزیراعظم شہباز شریف نے کہا کہ یہ منصوبہ غزہ میں جاری جنگ کے خاتمے اور خطے میں پائیدار امن کے قیام کی جانب ایک اہم قدم ہے۔ انہوں نے کہا کہ فلسطینیوں اور اسرائیل کے درمیان مستقل امن، مشرق وسطیٰ کے سیاسی استحکام اور اقتصادی ترقی کے لیے ناگزیر ہے۔ وزیراعظم نے صدر ٹرمپ کی قیادت اور ان کے خصوصی ایلچی اسٹیو وٹکوف کے کردار کو سراہتے ہوئے کہا کہ وہ اس جنگ کے خاتمے کے لیے مخلص اور متحرک نظر آتے ہیں۔ شہباز شریف نے دو ریاستی حل کی بھرپور حمایت کا اعادہ کرتے ہوئے کہا کہ یہ حل خطے میں دیرپا امن کی ضمانت ہے۔ اس موقع پر انہوں نے اپنی امریکی صدر سے حالیہ ملاقات کو بھی حوصلہ افزا قرار دیا اور بتایا کہ معیشت، ٹیکنالوجی، انسداد دہشت گردی اور سرمایہ کاری سے متعلق مختلف امور پر بات چیت ہوئی، جس میں امریکہ نے پاکستان میں سرمایہ کاری کی خواہش ظاہر کی۔ وزیراعظم نے پاکستان کی معاشی بہتری، حالیہ جنگی حالات اور اوورسیز پاکستانیوں کی خدمات پر بھی اظہارِ خیال کرتے ہوئے کہا کہ ملک اب معاشی استحکام کی جانب گامزن ہے اور مہنگائی کی شرح سنگل ڈیجٹ تک پہنچ چکی ہے۔