عمران خان کا چیف جسٹس یحییٰ آفریدی کو خط

راولپنڈی کی اڈیالہ جیل سے پاکستان تحریک انصاف کے پیٹرن انچیف اور سابق وزیراعظم عمران خان نے چیف جسٹس آف پاکستان یحییٰ آفریدی کے نام ایک خط تحریر کیا ہے جس میں انہوں نے عدالتی حلف کی پاسداری، جرات مندانہ فیصلوں اور عدلیہ کی آزادی کو بحال کرنے کی اپیل کی ہے۔ عمران خان نے لکھا کہ وہ سپریم کورٹ سے صرف 31 کلومیٹر کے فاصلے سے یہ خط بھیج رہے ہیں، لیکن گزشتہ 772 دن سے انہیں اور ان کی اہلیہ بشریٰ بی بی کو وہاں سے انصاف نہیں مل رہا۔ انہوں نے دعویٰ کیا کہ بشریٰ بی بی نہایت صبر سے جیل میں غیر انسانی اور ذلت آمیز سلوک سہہ رہی ہیں، انہیں علاج، کتابوں، ٹی وی اور باہر کی دنیا سے مکمل طور پر محروم رکھا گیا ہے۔ خط میں کہا گیا کہ پاکستانی قانون خواتین کو ضمانت کے لیے خصوصی رعایت دیتا ہے لیکن بشریٰ بی بی کے معاملے میں صرف اس لیے انکار کیا گیا کیونکہ وہ عمران خان کی اہلیہ ہیں۔ عمران خان نے انکشاف کیا کہ ان پر 300 سے زائد سیاسی مقدمات قائم کیے گئے ہیں جبکہ بشریٰ بی بی کی صحت بگڑتی جا رہی ہے اور ڈاکٹر کو معائنے کی اجازت بھی نہیں دی جا رہی۔ انہوں نے چیف جسٹس سے گزارش کی کہ وہ اپنے حلف کی لاج رکھیں اور عدلیہ کو انصاف کی آخری امید بنائیں، کیونکہ پاکستان اس وقت تاریخ کے ایک اہم اور فیصلہ کن موڑ پر کھڑا ہے۔