صدر ٹرمپ کا قطر سے متعلق اہم بیان: اسرائیل کو محتاط رہنے کا مشورہ

امریکی صدر ڈونلڈ ٹرمپ نے قطر کو امریکہ کا ایک مضبوط اور قریبی اتحادی قرار دیتے ہوئے اسرائیل کو خبردار کیا ہے کہ وہ قطر کے حوالے سے انتہائی محتاط رویہ اختیار کرے۔ واشنگٹن میں صحافیوں سے گفتگو کرتے ہوئے صدر ٹرمپ نے امیر قطر شیخ تمیم بن حمد آل ثانی کو ایک عظیم رہنما قرار دیا اور کہا کہ قطر کے حوالے سے بہت سے لوگ یہ نہیں جانتے کہ وہ امریکہ کا خاص اتحادی ہے، اس لیے حماس یا دیگر معاملات میں قطر کو نشانہ بناتے وقت محتاط رہنا چاہیے۔

صدر ٹرمپ نے صحافی چارلی کرک کے قتل پر جشن منانے والوں کو ذہنی مریض قرار دیتے ہوئے کہا کہ ان کی چھان بین جاری ہے اور یہ رویہ قابل مذمت ہے۔ ایک سوال کے جواب میں انہوں نے روس پر پابندیاں عائد کرنے کی تیاری کا عندیہ دیتے ہوئے کہا کہ امریکہ نہیں چاہتا کہ یورپی ممالک روس سے تیل یا گیس خریدیں، اور یہ کہ روس سے کسی قسم کی خریداری نہیں ہونی چاہیے۔

دوسری جانب امریکی وزیر خارجہ مارکو روبیو نے کہا ہے کہ قطر پر اسرائیلی حملے پر صدر ٹرمپ ناخوش ہیں، تاہم اس کا امریکہ اور اسرائیل کے تعلقات پر کوئی منفی اثر نہیں پڑے گا۔ انہوں نے واضح کیا کہ واشنگٹن اور تل ابیب کے تعلقات ہمیشہ مضبوط رہے ہیں اور رہیں گے۔ مارکو روبیو نے بتایا کہ کئی ممالک قطر میں پیش آنے والے واقعے پر ناراض ہیں، اور امریکہ نے اس حوالے سے ہونے والی بین الاقوامی میٹنگ میں شرکت نہ کرنے کا فیصلہ کیا ہے۔

ان کا مزید کہنا تھا کہ صدر ٹرمپ یرغمالیوں کی رہائی اور تنازع کے خاتمے کے خواہاں ہیں تاکہ غزہ کی تعمیر نو اور سکیورٹی کی بحالی کی طرف پیش قدمی کی جا سکے۔ تاہم غزہ پر اسرائیلی حملے میں امریکی حمایت کے سوال پر انہوں نے براہ راست جواب دینے سے گریز کیا اور کہا کہ فلسطینی ریاست کو تسلیم کرنے والے ممالک کو پہلے ہی خبردار کیا گیا تھا، اور اسرائیل کا سخت ردعمل انہی فیصلوں کا نتیجہ ہے