news
قطر پر اسرائیلی حملہ سفارتکاری کی توہین ہے، وزیراعظم قطر
قطر کے وزیراعظم محمد بن عبدالرحمان الثانی نے اقوام متحدہ کی سلامتی کونسل کے ہنگامی اجلاس سے خطاب کرتے ہوئے کہا ہے کہ اسرائیل نے قطر کی حدود پر حملہ کرکے نہ صرف ہماری خودمختاری کو چیلنج کیا ہے بلکہ عالمی سفارتکاری کی توہین بھی کی ہے۔ انہوں نے واضح کیا کہ اس حملے کے نتیجے میں قطر کو جانی اور مالی نقصان برداشت کرنا پڑا، جس کی وہ شدید مذمت کرتے ہیں۔ وزیراعظم قطر نے کہا کہ قطر کا ثالثی کردار دنیا بھر میں سراہا گیا ہے اور اسرائیلی حملہ ان امن کوششوں کو سبوتاژ کرنے کی دانستہ کوشش ہے۔
انہوں نے اس بات پر زور دیا کہ اسرائیل حماس رہنماؤں کو نشانہ بنا کر غزہ میں جاری جنگ کے خاتمے کی کوششوں کو ناکام بنانا چاہتا ہے، تاہم قطر ایسے کسی دباؤ میں نہیں آئے گا۔ محمد بن عبدالرحمان الثانی نے سلامتی کونسل کو یقین دلایا کہ ان کا ملک انسانی ہمدردی اور امن کے لیے اپنی سفارتی کوششیں بلاتعطل جاری رکھے گا، تاکہ خطے میں جاری خونریزی روکی جا سکے۔