وزیراعظم شہباز شریف، اماراتی صدر دوحہ پہنچ گئے

دوحہ — اسرائیل کی جانب سے قطر پر حملے کے خلاف اظہارِ یکجہتی کے طور پر پاکستان، متحدہ عرب امارات اور سعودی عرب کے اعلیٰ رہنما قطر پہنچ رہے ہیں۔ وزیراعظم شہباز شریف اپنے ایک روزہ دورے پر قطری دارالحکومت دوحہ پہنچے، جہاں ان کا استقبال قطر کے نائب وزیراعظم اور وزیرِ دفاع شیخ سعود بن عبد الرحمان بن حسن آل ثانی نے کیا۔

وزیراعظم کے ہمراہ اعلیٰ سطحی پاکستانی وفد بھی موجود ہے، جس میں نائب وزیراعظم و وزیرِ خارجہ اسحاق ڈار، وزیرِ دفاع خواجہ محمد آصف، وزیر اطلاعات عطاء اللہ تارڑ اور معاون خصوصی طارق فاطمی شامل ہیں۔

دورے کے دوران وزیراعظم شہباز شریف کی قطری امیر شیخ تمیم بن حماد آل ثانی سے اہم ملاقات ہوگی، جس میں وہ اسرائیلی جارحیت، بین الاقوامی قوانین کی خلاف ورزی اور خطے میں امن و استحکام کے حوالے سے تبادلہ خیال کریں گے۔ وزیراعظم اس موقع پر اس عزم کا اظہار بھی کریں گے کہ پاکستان ہر مشکل وقت میں قطر کے ساتھ کھڑا رہا ہے اور کھڑا رہے گا۔

ذرائع کے مطابق متحدہ عرب امارات کے صدر محمد بن زاید آل نہیان بھی قطر پہنچ چکے ہیں جبکہ سعودی ولی عہد محمد بن سلمان کی آمد بھی متوقع ہے۔ تینوں رہنما اسرائیل کی جانب سے قطر پر حملے کی شدید مذمت اور قطری قیادت سے یکجہتی کے لیے دوحہ کا رخ کر رہے ہیں۔

واضح رہے کہ قطر میں اتوار اور پیر کو ایک ہنگامی عرب اسلامی سربراہی اجلاس بھی منعقد ہو رہا ہے، جس کی میزبانی قطر کر رہا ہے۔ اجلاس میں اسرائیل کی تازہ جارحیت اور حماس کے رہنماؤں پر حملوں کے تناظر میں علاقائی سلامتی اور سیاسی حکمتِ عملی پر غور کیا جائے گا۔

یہ اجلاس نہ صرف امتِ مسلمہ کے اتحاد کی علامت ہے بلکہ اسرائیلی جارحیت کے خلاف عالمی سطح پر اجتماعی ردعمل کے اظہار کا اہم موقع بھی بنے گا