news
مشی خان کا سوشل میڈیا سے وقفہ، ذہنی صحت کو ترجیح دینے کا فیصلہ
اداکارہ اور ٹی وی میزبان مشی خان نے سوشل میڈیا پر اپنی سرگرمیوں سے متعلق اہم اعلان کرتے ہوئے کہا ہے کہ وہ اب کچھ وقت کے لیے سوشل میڈیا سے دور رہنے کا فیصلہ کر چکی ہیں۔ انہوں نے انسٹاگرام پر ایک پوسٹ کے ذریعے مداحوں کو بتایا کہ وہ اب سماجی مسائل پر ویڈیوز نہیں بنائیں گی کیونکہ وہ اپنی ذہنی صحت کو ترجیح دینا چاہتی ہیں۔
مشی خان، جو ہمیشہ معاشرتی ناانصافیوں اور غلط رویوں پر کھل کر آواز اٹھاتی رہی ہیں، اس بار مایوسی کا شکار نظر آئیں۔ ان کا کہنا تھا کہ اب انہیں امید نہیں رہی کہ ملک میں کچھ بدلے گا، اس لیے وہ اب ایسے موضوعات پر کوئی بات نہیں کریں گی کہ کیا غلط ہو رہا ہے۔
اداکارہ نے مزید کہا کہ معاشرتی مسائل اور تکلیف دہ مناظر دیکھ کر ان کا ذہن مفلوج سا ہو گیا ہے، اور اس ذہنی دباؤ سے نکلنے کے لیے انہوں نے سوشل میڈیا سے وقتی کنارہ کشی اختیار کرنے کا فیصلہ کیا ہے۔ اب وہ کچھ وقت اپنی زندگی پر توجہ دیں گی۔
مشی خان کے مداح ان کے اس فیصلے کو سراہ رہے ہیں اور ان کے لیے نیک تمناؤں کا اظہار کرتے ہوئے انہیں آرام کا مشورہ دے رہے ہیں۔