محمد شیراز اور مسکان نے یوٹیوب آمدنی سے گاؤں میں جدید اسکول

پاکستان کے مشہور ننھے یوٹیوبرز محمد شیراز اور مسکان نے ایک قابلِ تحسین اقدام کرتے ہوئے سوشل میڈیا سے حاصل ہونے والی آمدنی کو اپنے گاؤں کے بچوں کے مستقبل سنوارنے کے لیے استعمال کیا۔ انہوں نے اپنے گاؤں کے اس خستہ حال اسکول کو، جہاں بچے کھلے آسمان تلے، بغیر میز و کرسی کے تعلیم حاصل کرنے پر مجبور تھے، ایک جدید اور مکمل تعلیمی ادارے میں تبدیل کر دیا ہے۔

شیراز کے والد نے کچھ عرصہ قبل ایک ویڈیو شیئر کی تھی جس میں اسکول کی ابتر حالت دکھائی گئی تھی۔ ویڈیو میں دیکھا جا سکتا تھا کہ بچے نہ صرف بنیادی سہولیات سے محروم تھے بلکہ ان کے پاس مناسب لباس، جوتے اور کلاس رومز بھی موجود نہیں تھے۔

تاہم اب، یوٹیوب سے حاصل شدہ آمدنی کی مدد سے، شیرازی فیملی نے گاؤں میں ایک نیا اسکول تعمیر کروا دیا ہے جس میں کشادہ اور روشن کلاس رومز، معیاری تعلیمی ساز و سامان، تفریحی سہولیات اور بچوں کے لیے ایک محفوظ تعلیمی ماحول فراہم کیا گیا ہے۔

حال ہی میں جاری کردہ ایک ویڈیو میں محمد شیراز نے پیغام دیا کہ اگر یوٹیوبرز محنت اور نیک نیتی سے کام کریں تو وہ اپنی کمائی کو معاشرتی بہتری کے لیے استعمال کر سکتے ہیں۔ انہوں نے بتایا کہ ان کا مقصد صرف ویڈیوز بنانا نہیں بلکہ اپنے گاؤں اور ملک کی خدمت کرنا ہے۔

سوشل میڈیا پر ننھے شیراز اور مسکان کے اس دل کو چھو لینے والے اقدام کو بہت سراہا جا رہا ہے۔ صارفین نے تبصروں میں نہ صرف ان دونوں بہن بھائیوں کی تعریف کی بلکہ ان کے والدین کو بھی خراجِ تحسین پیش کیا جنہوں نے بچوں کی تربیت میں ایک عمدہ مثال قائم کی۔ بہت سے صارفین نے انہیں “قوم کے ہیرو” اور “نئی نسل کے لیے مشعل راہ” قرار دیا۔