news
عمران خان کی واضح ہدایت کے باوجود پی ٹی آئی کے 25 ارکان
پاکستان تحریک انصاف کے پیٹرن انچیف عمران خان کی واضح ہدایت کے باوجود پارٹی کے 25 اراکین قومی اسمبلی نے تاحال پارلیمانی قائمہ کمیٹیوں سے استعفیٰ نہیں دیا۔ میڈیا رپورٹس کے مطابق ان ارکان میں سلیم رحمان، سہیل سلطان، بشیر خان، نواز خان، محمد عاطف، شیر علی ارباب، ذوالفقار علی، نسیم علی شاہ اور شیر افضل خان شامل ہیں۔ مزید جنہوں نے استعفے نہیں دیے ان میں محمد مبین عارف، اسامہ احمد میلہ، محمد مقداد علی، غلام محمد، علی افضل ساہی، محمد سعد اللہ، عمر فاروق، ریاض فتیانہ، محبوب سلطان، سردار لطیف کھوسہ، عائشہ نذیر، میاں غوث محمد، معظم علی خان، فیاض حسین، امبر مجید اور خواجہ شیراز محمود شامل ہیں۔ واضح رہے کہ عمران خان نے تمام ارکان کو ہدایت کی تھی کہ قومی اسمبلی کی تمام قائمہ کمیٹیوں سے مستعفی ہو جائیں، یہ پیغام ان کی ہمشیرہ علیمہ خان نے اڈیالہ جیل میں ملاقات کے بعد میڈیا کو دیا تھا۔ عمران خان کی اس ہدایت پر عمل کرتے ہوئے جنید اکبر خان نے پبلک اکاؤنٹس کمیٹی کی چیئرمین شپ چھوڑ دی جبکہ موجودہ پارٹی چیئرمین بیرسٹر گوہر بھی چار اہم کمیٹیوں سے مستعفی ہو چکے ہیں۔ اب تک مجموعی طور پر پی ٹی آئی کے 51 ارکان نے کمیٹیوں سے استعفیٰ دے دیا ہے، تاہم 25 ارکان تاحال اپنی نشستوں پر موجود ہیں۔