news
پاکستان اسٹاک ایکسچینج میں تاریخ ساز تیزی
کراچی:
پاکستان اسٹاک ایکسچینج میں تیزی کا رجحان برقرار ہے اور آج مسلسل تیسرے دن بھی زبردست بہتری دیکھنے میں آئی ہے، جس کے نتیجے میں 100 انڈیکس نئی تاریخی بلند ترین سطح پر پہنچ گیا ہے۔
پاکستان اسٹاک ایکسچینج کے آغاز پر ہی سرمایہ کاروں کی بھرپور دلچسپی دیکھی گئی، جس کے باعث انڈیکس میں 836 پوائنٹس کا اضافہ ہوا اور یہ بڑھ کر 1,53,038 پوائنٹس تک جا پہنچا۔ بعدازاں تیزی کا سلسلہ جاری رہا اور انڈیکس 1084 پوائنٹس کے اضافے کے ساتھ 1,53,286 پوائنٹس پر بند ہوا، جو پاکستان اسٹاک مارکیٹ کی تاریخ کی نئی بلند ترین سطح ہے۔
گزشتہ روز بھی مارکیٹ میں 1560 پوائنٹس کی زبردست تیزی دیکھی گئی تھی اور انڈیکس 1,52,535 پوائنٹس پر بند ہوا تھا، جس نے آج کے لیے بنیاد فراہم کی۔
کاروباری و مالیاتی ماہرین کے مطابق اسٹاک مارکیٹ میں اس تیزی کی وجہ سرمایہ کاروں کا بڑھتا ہوا اعتماد، ملکی معیشت میں بہتری کے آثار، اور حکومتی معاشی پالیسیوں کے اثرات ہیں۔ سرمایہ کار مارکیٹ کی موجودہ صورتحال کو سرمایہ کاری کے لیے سازگار اور مستحکم ماحول کی علامت قرار دے رہے ہیں۔