ثانیہ سعید کا بولڈ مؤقف: ہر شادی شدہ جوڑا والدین بننے کے قابل نہیں ہوتا

پاکستان کی سینئر اور معروف اداکارہ ثانیہ سعید نے حالیہ مارننگ شو میں شرکت کے دوران بچوں کی پرورش سے متعلق ایک اہم اور جرات مندانہ مؤقف اختیار کیا ہے۔ ان کا کہنا تھا کہ بچے پیدا کرنا ایک بہت بڑی ذمہ داری ہے، اور بدقسمتی سے ہمارے معاشرے میں ہر شادی شدہ جوڑا اس ذمہ داری کو نبھانے کے قابل نہیں ہوتا۔

گفتگو کے دوران انہوں نے والدین کی جذباتی اور ذہنی صحت کے پہلو پر زور دیتے ہوئے کہا کہ بہت سے والدین نہ تو ذہنی طور پر مستحکم ہوتے ہیں اور نہ ہی انہیں بچوں کی پرورش سے متعلق ضروری آگاہی یا تیاری حاصل ہوتی ہے۔ ان کے مطابق صرف شادی شدہ ہونا اس بات کی دلیل نہیں کہ وہ جوڑا اولاد کا حقدار بھی ہے۔

ثانیہ سعید نے یہ سوال بھی اٹھایا کہ کیا ہم نے کبھی سوچا ہے کہ جن جوڑوں پر بچے پیدا کرنے کا دباؤ ڈالا جاتا ہے، وہ واقعی ایسی بھاری ذمہ داری کے لیے تیار بھی ہیں یا نہیں؟ ان کا کہنا تھا کہ ایک چھوٹا بچہ کسی بھی جذباتی طور پر ناپختہ شخص کو نفسیاتی مسائل میں مبتلا کر سکتا ہے، اور پاکستان میں نوجوان والدین خاص طور پر ماؤں کو زچگی کے بعد ڈپریشن جیسے سنجیدہ مسائل کا سامنا ہوتا ہے۔

اداکارہ نے اس بات پر بھی تنقید کی کہ ہمارے ہاں لوگ معاشرتی دباؤ کے تحت دوسروں کو بچے پیدا کرنے کا مشورہ دیتے ہیں، مگر وہ خود اس کے نتائج یا اثرات کا اندازہ نہیں لگاتے۔

ان کی گفتگو نے ناظرین کو بچوں کی پیدائش اور پرورش جیسے نازک موضوع پر گہرائی سے سوچنے پر مجبور کر دیا ہے۔