news
گوگل کی جی میل صارفین کو ہیکرز کے بڑے حملے پر وارننگ
ٹیکنالوجی کمپنی گوگل نے دنیا بھر میں اپنے جی میل صارفین کو ایک سنگین سیکیورٹی خطرے سے آگاہ کرتے ہوئے خبردار کیا ہے کہ ایک منظم اور خطرناک ہیکرز گروپ بڑی تعداد میں صارفین کو نشانہ بنا رہا ہے۔ یہ حملے اُس وقت شروع ہوئے جب ہیکرز نے سیلز فورس کے کلاؤڈ پلیٹ فارم میں کامیابی سے دراندازی کی، جس کے بعد گوگل سروسز کے صارفین، خصوصاً جی میل اور گوگل کلاؤڈ کے اکاؤنٹ ہولڈرز، مزید حملوں کا آسان ہدف بن گئے۔
گوگل کی رپورٹ کے مطابق، دنیا بھر میں تقریباً ڈھائی ارب افراد اس کی سروسز استعمال کرتے ہیں، جس کے باعث یہ سائبر حملے انتہائی تشویشناک قرار دیے جا رہے ہیں۔ کمپنی کے تھریٹ انٹیلیجنس گروپ نے ان حملوں کی ابتدائی نشاندہی جون میں کی تھی، جبکہ اگست میں اس بات کی باقاعدہ تصدیق ہوئی کہ صارفین کے پاسورڈز افشاء ہونے کی وجہ سے متعدد اکاؤنٹس پر کامیاب حملے ہو چکے ہیں۔
گوگل نے اپنے تمام صارفین کو ہدایت کی ہے کہ وہ کسی بھی مشتبہ ای میل، لاگ ان الرٹس یا سیکیورٹی سے متعلق سرگرمی کے بارے میں انتہائی چوکننا رہیں اور فوری طور پر دوہری تصدیق (Two-Factor Authentication) جیسے اقدامات کو فعال کریں تاکہ اکاؤنٹس کو محفوظ بنایا جا سکے۔