پنجاب میں چار دہائیوں کا بدترین سیلاب

پنجاب میں مون سون بارشوں اور بھارت کی جانب سے ڈیموں سے اضافی پانی چھوڑنے کے بعد دریائے چناب، ستلج اور راوی میں شدید طغیانی نے تباہی مچا دی ہے، جسے حالیہ چالیس سالوں کا بدترین سیلاب قرار دیا جا رہا ہے۔ سیلابی صورتحال کے باعث صوبے بھر میں 14 لاکھ 60 ہزار سے زائد افراد متاثر ہو چکے ہیں، جب کہ ہزاروں دیہات زیرِ آب آ چکے ہیں۔

میڈیا رپورٹس کے مطابق، تینوں دریا بپھر جانے کے بعد پنجاب حکومت نے دریا کے کناروں پر بنے حفاظتی بند کئی مقامات پر جان بوجھ کر توڑ دیے تاکہ شہری علاقوں کو بچایا جا سکے۔ نتیجتاً، جھنگ، شورکوٹ، خانیوال، ملتان، مظفرگڑھ، شجاع آباد، جلالپور پیروالا اور علی پور سمیت کئی اضلاع میں بڑے پیمانے پر نقل مکانی کا عمل جاری ہے۔

پی ڈی ایم اے کی رپورٹ کے مطابق، اب تک 1692 موضع جات زیر آب آ چکے ہیں، اور 2 لاکھ 65 ہزار سے زائد افراد کو محفوظ مقامات پر منتقل کیا جا چکا ہے۔ 355 ریلیف کیمپس قائم کیے گئے ہیں جہاں 1372 افراد مقیم ہیں، جبکہ 6,656 افراد کو فوری طبی امداد فراہم کی گئی ہے۔

سیلاب سے متاثرہ علاقوں کی تفصیلات کچھ یوں ہیں:

• دریائے چناب: 991 دیہات متاثر
• سیالکوٹ: 395 دیہات
• جھنگ: 127 دیہات
• ملتان: 124 دیہات
• چنیوٹ: 48 دیہات
• گجرات: 66 دیہات
• خانیوال: 51 دیہات
• حافظ آباد: 45 دیہات
• سرگودھا: 41 دیہات
• منڈی بہاؤالدین: 35 دیہات
• وزیرآباد: 19 دیہات

دریائے راوی میں:

• نارووال: 75 دیہات
• شیخوپورہ: 4 دیہات
• ننکانہ صاحب: 1 گاؤں

ان علاقوں سے 11 ہزار افراد اور 4500 مویشیوں کو محفوظ مقامات پر منتقل کیا گیا۔

دریائے ستلج میں:

• قصور: 72 دیہات
• اوکاڑہ: 86 دیہات
• پاکپتن: 24 دیہات
• ملتان: 27 دیہات
• وہاڑی: 23 دیہات
• بہاولنگر: 104 دیہات
• بہاولپور: 25 دیہات

یہاں سے ایک لاکھ 27 ہزار سے زائد افراد اور 70 ہزار مویشیوں کو بچا کر محفوظ مقامات پر منتقل کیا گیا ہے۔

سیلاب سے نہ صرف انسانی جانیں متاثر ہو رہی ہیں بلکہ ہزاروں ایکڑ پر کھڑی فصلیں بھی تباہ ہو چکی ہیں، جس سے زرعی شعبے کو ناقابل تلافی نقصان پہنچا ہے۔ حکومت اور امدادی ادارے صورتحال پر قابو پانے کی بھرپور کوششیں کر رہے ہیں، تاہم متاثرین کی بحالی اور امداد ایک بڑے چیلنج کی صورت اختیار کر چکی ہے