news
پاکستان، مصر اور الجزائر کا غزہ میں فوری جنگ بندی اور امداد پر زور
اسلام آباد میں او آئی سی وزرائے خارجہ کے 21 ویں غیر معمولی اجلاس کے دوران پاکستان، مصر اور الجزائر نے غزہ کی صورتحال پر گہری تشویش کا اظہار کیا اور فوری جنگ بندی کے ساتھ ساتھ انسانی امداد کی فراہمی پر زور دیا۔ نائب وزیر اعظم و وزیر خارجہ پاکستان اسحاق ڈار نے مصر کے وزیر خارجہ بدر عبدالعاطی اور الجزائر کے وزیر خارجہ احمد عطاف سے ملاقات کی جس میں فلسطین، بالخصوص غزہ کی تازہ صورتحال پر تبادلہ خیال کیا گیا۔ تینوں ممالک کے وزرائے خارجہ نے اہل غزہ تک امداد کی بروقت رسائی کو ناگزیر قرار دیتے ہوئے دیرپا امن اور مسلم اُمہ کے اتحاد کی ضرورت پر زور دیا۔ اس موقع پر اسحاق ڈار نے مصر اور الجزائر کے ساتھ تعلقات کو مزید مضبوط بنانے اور کثیرالجہتی تعاون کے فروغ کے عزم کا اعادہ کیا۔