news
بانی پی ٹی آئی اور بشریٰ بی بی کی جیل سماعت میں وکلاء و فیملی کو شامل کرنے کا حکم
سپیشل جج سینٹرل شاہ رخ ارجمند نے بانی پی ٹی آئی اور ان کی اہلیہ بشریٰ بی بی کے خلاف توشہ خانہ کیس ٹو کی سماعت میں اڈیالہ جیل سپرنٹنڈنٹ کو ہدایت کی ہے کہ وکلاء اور اہل خانہ کو کارروائی میں شامل ہونے کی اجازت دی جائے۔ بانی پی ٹی آئی عدالت نے گزشتہ جیل سماعت کا تحریری حکم نامہ جاری کرتے ہوئے کہا کہ جن وکلاء نے وکالت نامے جمع کرا رکھے ہیں، انہیں سماعت میں شرکت کی اجازت دی جائے، جبکہ جیل کے باہر موجود فیملی ممبران کو بھی اندر آنے دیا جائے۔ یہ حکم بیرسٹر سلمان صفدر کی اس درخواست پر جاری کیا گیا جس میں وکلاء اور اہل خانہ کو روکنے پر اعتراض اٹھایا گیا تھا۔ عدالت نے سپرنٹنڈنٹ کو احکامات جاری کرنے کے بعد درخواست نمٹا دی۔