پنجاب سمیت ملک کے مختلف علاقوں میں طوفانی بارشوں کا امکان

پنجاب سمیت ملک کے بیشتر علاقوں میں آج سے موسلا دھار بارشوں کا سلسلہ شروع ہونے کا امکان ہے جس کے باعث اربن فلڈنگ اور لینڈ سلائیڈنگ کے خطرات بڑھ گئے ہیں۔ انتظامیہ نے تمام محکموں کو الرٹ جاری کرتے ہوئے نشیبی علاقوں میں رہنے والے شہریوں کو احتیاطی تدابیر اختیار کرنے کی ہدایت کی ہے۔

محکمہ موسمیات کے مطابق خیبرپختونخوا کے چترال، دیر، سوات، شانگلہ، بونیر، کوہستان، مانسہرہ اور ایبٹ آباد کے اضلاع میں ندی نالوں میں طغیانی آسکتی ہے، جبکہ مری، گلیات، اسلام آباد، راولپنڈی، شمال مشرقی پنجاب، کشمیر اور ڈیرہ غازی خان کے نشیبی علاقے زیر آب آنے کا خدشہ ہے۔ گلگت بلتستان اور دیگر پہاڑی علاقوں میں لینڈ سلائیڈنگ کے باعث ٹریفک کی روانی متاثر ہو سکتی ہے۔

پنجاب کے مختلف اضلاع بشمول لاہور، راولپنڈی، گوجرانوالہ، سیالکوٹ، فیصل آباد، سرگودھا اور نارووال میں بارش کی پیش گوئی کی گئی ہے، جبکہ دریائے چناب، جہلم، راوی اور ستلج میں درمیانے سے اونچے درجے کے سیلاب کا خدشہ ظاہر کیا گیا ہے۔ پی ڈی ایم اے کے مطابق دریائے توی سے آنے والا پانی دریائے چناب میں داخل ہو کر گجرات، منڈی بہاؤالدین، چنیوٹ اور جھنگ کے علاقوں کو متاثر کر سکتا ہے۔

ڈی جی پی ڈی ایم اے نے گجرات اور سیالکوٹ کی ضلعی انتظامیہ کو ہائی الرٹ رہنے کی ہدایت کرتے ہوئے کہا کہ متاثرہ علاقوں میں فلڈ ریلیف کیمپس قائم کر دیے گئے ہیں جہاں متاثرین کے لیے بنیادی سہولیات اور ادویات دستیاب ہوں گی۔ شہریوں کو ہدایت کی گئی ہے کہ وہ دریاؤں، ندی نالوں اور پہاڑی علاقوں کے قریب جانے سے گریز کریں اور موسمی حالات سے باخبر رہیں۔