news
ہنگو میں ایف سی پوسٹ پر دہشتگردوں کا حملہ، 3 اہلکار شہید، 17 زخمی
صوبہ خیبر پختونخوا کے ضلع ہنگو کے علاقے طورہ وڑی میں فیڈرل کانسٹیبلری (ایف سی) کی پوسٹ پر دہشتگردوں نے حملہ کیا جس کے نتیجے میں 3 اہلکار شہید اور 17 زخمی ہوگئے۔ ایس پی آپریشنز اسد زبیر کے مطابق دہشتگردوں نے دوآبہ کے قریب ایف سی کے قلعے کو نشانہ بنایا، تاہم پولیس اور ایف سی اہلکاروں کی بھرپور جوابی کارروائی کے بعد دہشتگرد فرار ہوگئے۔ زخمیوں کو فوری طور پر دوآبہ اسپتال منتقل کر دیا گیا۔
وفاقی وزیر داخلہ محسن نقوی نے ہنگو واقعے کی شدید مذمت کرتے ہوئے کہا کہ بھارتی سرپرستی میں سرگرم دہشتگردوں کے اس حملے کو ایف سی کے بہادر جوانوں نے جان کا نذرانہ پیش کرکے ناکام بنایا۔ انہوں نے شہید اہلکاروں کو خراج عقیدت پیش کرتے ہوئے ان کے لواحقین سے دلی تعزیت کا اظہار کیا اور زخمی اہلکاروں کے علاج معالجے کے لیے بہترین سہولتیں فراہم کرنے کی ہدایت کی۔ وزیر داخلہ نے کہا کہ شہدا کی قربانی کبھی رائیگاں نہیں جائے گی اور پوری قوم ان کی بہادری کو سلام پیش کرتی ہے