news
گلگت بلتستان غذر: گلیشیئر پھٹنے سے سیلاب، متعدد دیہات متاثر، 50 افراد ریسکیو
گلگت بلتستان کے ضلع غذر میں گلیشیئر پھٹنے کے باعث ایک بار پھر سیلابی صورتحال پیدا ہوگئی ہے جس سے متعدد دیہات زیر آب آگئے جبکہ راؤشن گاؤں کی پوری آبادی محصور ہو گئی۔ درجنوں افراد پھنس گئے جن میں سے 50 سے زائد کو ریسکیو آپریشن کے ذریعے بحفاظت نکال لیا گیا۔ گلگت بلتستان حکومت کے ترجمان فیض اللہ کے مطابق سیلاب سے لوگوں کو بھاری مالی نقصان پہنچا ہے تاہم خوش قسمتی سے کوئی جانی نقصان نہیں ہوا۔ حکام کے مطابق لینڈ سلائیڈنگ کے باعث دریائے غذر کا بہاؤ رک گیا ہے جس سے عطا آباد جھیل جیسی صورتحال پیدا ہوگئی ہے اور گلگت شندور روڈ مکمل طور پر بند ہے۔ ضلعی انتظامیہ نے بتایا کہ لوگوں کو بروقت آگاہ کرنے کے باعث جانی نقصان سے بچاؤ ممکن ہوا۔ وزیر داخلہ جی بی شمس لون نے کہا کہ صورتحال سے نمٹنے کے لیے ہیلی کاپٹر طلب کیا گیا ہے تاکہ پھنسے ہوئے افراد کو نکالا جا سکے۔ ایف سی این اے کی جانب سے بھی ہنگامی بنیادوں پر امدادی کارروائیاں جاری ہیں جبکہ ریسکیو 1122 اور ڈیزاسٹر مینجمنٹ کی ٹیمیں موقع پر موجود ہیں۔