علیمہ خان کے بیٹے شاہریز خان کے مبینہ اغوا پر تحریک انصاف کا شدید ردعمل

تحریک انصاف نے الزام عائد کیا ہے کہ سابق وزیراعظم عمران خان کی بہن علیمہ خان کے بیٹے شاہریز خان کو ان کے دو کمسن بچوں کے سامنے زبردستی کمرے میں گھس کر تشدد کا نشانہ بنایا گیا اور مسلح افراد دروازے توڑ کر انہیں بیڈ روم سے اغوا کرکے لے گئے۔ ترجمان تحریک انصاف نے واقعے کو شرمناک اور بزدلانہ حرکت قرار دیتے ہوئے کہا کہ ملازمین پر بھی بہیمانہ تشدد کیا گیا جبکہ یہ حکومتی دہشتگردی کی بدترین مثال ہے۔ پارٹی کے مطابق گزشتہ روز شاہریز خان کو اپنی اہلیہ کے ہمراہ لاہور ایئرپورٹ سے غیر قانونی طور پر آف لوڈ بھی کیا گیا تھا، حالانکہ ان کا کسی سیاسی سرگرمی سے تعلق نہیں، صرف عمران خان کی بہن کا بیٹا ہونے کی وجہ سے نشانہ بنایا جا رہا ہے۔ پی ٹی آئی نے الزام لگایا کہ یہ سب کچھ وزیراعلیٰ مریم نواز کی حکومت کے حکم پر ہو رہا ہے، بانی تحریک انصاف کو جھکانے میں ناکامی کے بعد اب ان کے اہل خانہ کو نشانہ بنایا جا رہا ہے۔ ترجمان نے چیف جسٹس سے فوری نوٹس لیتے ہوئے شاہریز خان کی بازیابی کا مطالبہ کیا اور خبردار کیا کہ اگر انہیں رہا نہ کیا گیا تو عوامی ردعمل کو روکنا کسی کے بس میں نہیں ہوگا۔ دوسری جانب علیمہ خان نے بھی بیٹے کے اغوا کی تصدیق کرتے ہوئے الزام لگایا کہ چار مسلح نقاب پوش ان کے گھر میں کچن کے راستے داخل ہوئے اور شاہریز خان کو اس وقت اغوا کرلیا جب وہ اپنی اہلیہ اور والد کے ساتھ بالائی منزل پر موجود تھے، اس دوران اہل خانہ کو ہراساں اور ملازمین کو تشدد کا نشانہ بنایا گیا۔ اس سے قبل تحریک انصاف کے سیکرٹری جنرل سلمان اکرم راجہ نے بھی دعویٰ کیا کہ سادہ کپڑوں میں ملبوس افراد نے علیمہ خان کے گھر پر دھاوا بولا اور ان کے صاحبزادے کو اغوا کرلیا۔