خیبرپختونخوا حکومت کا سیلاب متاثرین کے لیے امدادی پیکج اور بحالی پلان

وزیراعلیٰ خیبرپختونخوا علی امین گنڈاپور نے کہا ہے کہ صوبائی حکومت سیلاب متاثرین کے گھروں، مال مویشیوں اور کاروبار کے نقصانات کا مکمل ازالہ کرے گی تاکہ لوگ دوبارہ اپنے پاؤں پر کھڑے ہو سکیں۔خیبرپختونخوا کابینہ کے 37ویں اجلاس کی صدارت کرتے ہوئے انہوں نے کہا کہ سیلاب میں جاں بحق ہونے والوں کے لیے دعا کی گئی جبکہ کابینہ کو نقصانات، ریلیف اور بحالی کی سرگرمیوں پر تفصیلی بریفنگ دی گئی۔ وزیراعلیٰ نے ضلعی انتظامیہ اور ریسکیو اداروں کی بروقت کارروائی کو سراہا اور کہا کہ ان کی بہترین کارکردگی قابلِ تعریف ہے۔

انہوں نے کہا کہ ریسکیو آپریشن مکمل ہوچکا ہے، تاہم لاپتہ افراد کی تلاش جاری ہے اور شہداء و زخمیوں کو معاوضوں کی ادائیگی بھی کی جا رہی ہے۔ متاثرین کو یقین دلایا گیا کہ کوئی بھی شخص امداد سے محروم نہیں رہے گا۔ متاثرہ علاقوں میں صحت مراکز، موبائل ہسپتال، ادویات، اور مال مویشیوں کے لیے چارہ فراہم کیا جا رہا ہے جبکہ وبائی امراض سے بچاؤ کے اقدامات بھی کیے جا رہے ہیں۔

مزید برآں، علی امین گنڈاپور نے کہا کہ تباہ شدہ گھروں کی تعمیر، لائیو اسٹاک کے نقصانات کا ازالہ، اور متاثرہ کاروبار کے لیے خصوصی پیکجز فراہم کیے جائیں گے۔ صفائی، پینے کے پانی، ٹیوب ویلز اور سڑکوں کی بحالی کا کام تیز کرنے کی ہدایت بھی دی گئی۔ انہوں نے اعلان کیا کہ سیلاب زدگان کے لیے عطیات شفاف انداز میں پہنچانے کے لیے خصوصی اکاؤنٹ قائم کیا جا رہا ہے اور تین ارب روپے کے ساتھ مزید دو ارب روپے کی امداد بھی جاری کر دی گئی ہے۔