وزیراعلیٰ علی امین گنڈا پور کا جلسے میں ریاست کو سخت پیغام

پہاڑ پور اسٹیڈیم میں جلسے سے خطاب کرتے ہوئے وزیراعلیٰ علی امین گنڈا پور نے کہا کہ ریاست نے بانی پی ٹی آئی عمران خان سمیت کئی رہنماؤں کو جیل میں ڈال رکھا ہے، مگر ریاست چلانے والوں کو یہ یاد رکھنا چاہیے کہ وقت ہمیشہ ایک جیسا نہیں رہتا۔ انہوں نے کہا کہ وہ قانون کی پاسداری کر رہے ہیں، لیکن عوام کو ان کے حقوق دینے کی ذمہ داری کس کی ہے؟ ان کا کہنا تھا کہ صوبے میں امن قائم کرنا اور دہشتگردی کا خاتمہ ناگزیر ہے، اور اگر کچھ لوگوں نے بندوق اٹھائی ہے تو اس میں ہماری بھی کوتاہی ہے، اس لیے انہیں سمجھانے کی ضرورت ہے۔ افغانستان کے ساتھ جاری مذاکرات کا ذکر کرتے ہوئے انہوں نے امید ظاہر کی کہ بات چیت سے مثبت نتائج نکلیں گے۔

وزیراعلیٰ علی امین گنڈا پور نے واضح کیا کہ عمران خان نے ہمیشہ پُرامن احتجاج کیا ہے، اس لیے سیاست کو بغاوت پر مجبور نہ کیا جائے۔ قبل ازیں اپنے بیان میں انہوں نے کہا کہ پی ٹی آئی کے خلاف انتقامی کارروائیاں عروج پر ہیں، آئین و قانون کا وجود ختم ہو چکا ہے، اور عوامی نمائندوں کو بلاوجہ نااہل کر کے ان کے حقوق سلب کیے جا رہے ہیں۔ ان کا کہنا تھا کہ الیکشن کے دوران ان کا مینڈیٹ چوری کر کے فارم 47 کی بنیاد پر حکومت مسلط کی گئی، سابق حکومتوں کی کرپشن کو ان کے خلاف ہتھیار بنایا جا رہا ہے، اور کوہستان اسکینڈل وفاقی معاملہ ہونے کے باوجود صوبائی حکومت پر الزام لگایا جا رہا ہے۔ انہوں نے کہا کہ انہیں قرضوں میں ڈوبا ہوا صوبہ ملا، مگر اب اسے مالی بحران سے نکال کر ترقی کی راہ پر ڈال دیا گیا ہے