news
باجوڑ اور لوئر دیر میں کلاؤڈ برسٹ اور بارشوں سے تباہی، 13 افراد جاں بحق
خیبرپختونخوا کے ضلع باجوڑ کی تحصیل سلارزئی میں کلاؤڈ برسٹ اور آسمانی بجلی گرنے سے تباہی مچ گئی، جس کے نتیجے میں 8 افراد جاں بحق، 4 زخمی اور 17 لاپتہ ہوگئے، جبکہ متعدد گھروں کو شدید نقصان پہنچا۔ ڈسٹرکٹ ایمرجنسی آفیسر امجد خان کی نگرانی میں ریسکیو آپریشن جاری ہے تاہم راستے بند ہونے کے باعث ٹیموں کو مشکلات درپیش ہیں اور مقامی آبادی اپنی مدد آپ کے تحت متاثرین کو نکالنے کی کوشش کر رہی ہے۔ اسی دوران لوئر دیر باجوڑ کے علاقے سوری پاؤ میں رات سے جاری بارش کے باعث مکان کی چھت گرنے سے ایک ہی خاندان کے 5 افراد، جن میں خواتین اور بچے شامل ہیں، جاں بحق اور 2 زخمی ہوگئے۔ دریائے پنجکوڑہ اور ندی نالوں میں طغیانی کے باعث رابطہ سڑکیں بند اور اوڈیگرام کا پل شدید متاثر ہوا، جس سے ٹریفک کا نظام مفلوج ہوگیا، تاہم ریسکیو ٹیموں نے سیلابی پانی میں پھنسے 25 سیاحوں کو بحفاظت نکال لیا۔