کینیڈا کے شہر مسّی ساگا میں 29 ستمبر سے یکم اکتوبر 2025ء تک جاری رہنے والے “اپیرل ٹیکسٹائل سورسنگ (ATS) شو” میں پاکستانی ٹیکسٹائل صنعت نے شاندار شرکت کی۔ اس بین الاقوامی تجارتی میلے میں پاکستان سمیت چین، بنگلا دیش، ویتنام اور کینیڈا کے نمائندوں نے حصہ لیا، جس نے اس نمائش کو عالمی سورسنگ اور صنعت سے جڑے ماہرین کے لیے ایک نمایاں پلیٹ فارم بنا دیا۔

پاکستانی نمائش کنندگان نے اعلیٰ معیار کی ویلیو ایڈڈ مصنوعات پیش کیں، جن میں اسپورٹس ویئر، ٹیکنیکل ٹیکسٹائلز اور حفاظتی ملبوسات شامل تھے۔ یہ نمائش پاکستان کی ٹیکسٹائل صنعت میں مہارت، پائیداری اور ہائی پرفارمنس مصنوعات کی ترقی کی بھرپور عکاسی کرتی ہے۔

شرکاء نے بتایا کہ اس سال کا رسپانس سابقہ برسوں کی نسبت خاصا بہتر رہا، اور متعدد خریداروں و صنعت کاروں سے مثبت تجارتی روابط قائم ہوئے۔ اس موقع پر شمالی امریکا میں ابھرتے ہوئے رجحانات، خاص طور پر ماحول دوست ٹیکسٹائل کی بڑھتی ہوئی مانگ سے متعلق قیمتی معلومات بھی حاصل کی گئیں، جو آئندہ تجارتی حکمتِ عملی کے لیے معاون ثابت ہوں گی۔

پاکستان میں معاشی غیر یقینی صورتحال اور کاروباری لاگت میں اضافے کے باعث گزشتہ تین برسوں کے دوران 30 سے زائد بین الاقوامی کمپنیاں ملک چھوڑ چکی ہیں۔ ان کمپنیوں میں مائیکروسافٹ، شیل، اوبر، یاماہا، ایلی لِلی اور حال ہی میں پروکٹر اینڈ گیمبل (P&G) شامل ہیں۔

ذرائع کے مطابق امریکی ملٹی نیشنل کمپنی پی اینڈ جی نے پاکستان میں اپنی پیداوار اور تجارتی سرگرمیاں بند کرنے کا فیصلہ کیا ہے اور اب یہ ادارہ صرف “تھرڈ پارٹی ڈسٹری بیوٹرز” کے ذریعے اپنا کاروبار چلائے گا۔ ماہرین کا کہنا ہے کہ بلند ٹیکس، روپے کی قدر میں کمی، سیکیورٹی خدشات اور غیر رسمی معیشت کے پھیلاؤ نے بین الاقوامی سرمایہ کاروں کے اعتماد کو شدید نقصان پہنچایا ہے۔

لاہور چیمبر آف کامرس کے صدر ابوذر شاد کے مطابق، ملک سے 30 بڑی ملٹی نیشنل کمپنیوں کے انخلا نے معیشت کو جھٹکا دیا ہے۔ انہوں نے کہا کہ “11 کروڑ افراد غربت کی لکیر سے نیچے جا چکے ہیں، گزشتہ 33 ماہ میں غربت 10 فیصد بڑھی ہے، جبکہ سیلابوں نے 25 لاکھ ایکڑ رقبہ تباہ کر دیا اور 70 فیصد فصلیں ختم ہو چکی ہیں۔ ایسے حالات میں معیشت کی بحالی ایک بڑا چیلنج ہے۔”

ماہرین کے مطابق اگر حکومت نے سرمایہ کاروں کے لیے ٹیکس اصلاحات، پالیسی استحکام اور سیکیورٹی ماحول بہتر نہ بنایا تو مزید بین الاقوامی کمپنیاں بھی ملک سے رخصت ہو سکتی ہیں۔