کراچی میں پاکستان ہندو کونسل کے تحت منعقدہ جاب و ایجوکیشن ایکسپو کے افتتاح کے بعد میڈیا سے گفتگو کرتے ہوئے وفاقی وزیر خزانہ محمد اورنگزیب نے کہا کہ ملک کی معیشت میں استحکام آ چکا ہے اور تین بڑی ریٹنگ ایجنسیاں پاکستان کے حوالے سے مثبت رویہ رکھتی ہیں۔ ان کا کہنا تھا کہ اسٹیٹ بینک ایکسچینج ریٹ اور شرح سود پر کام کر رہا ہے اور جیسے جیسے استحکام آئے گا صورتحال مزید بہتر ہوگی۔ وزیر خزانہ محمد اورنگزیب نے کہا کہ کارپوریٹ سیکٹر کو آگے آنا ہوگا، شرح سود کو واحد مسئلہ نہ سمجھا جائے کیونکہ پائیدار ترقی ہی اصل ہدف ہے۔ انہوں نے نوجوانوں کو مشورہ دیا کہ وہ ٹیکنالوجی کو اپنائیں، اپنی صلاحیتوں پر بھروسہ کریں اور ہمیشہ بہترین کی جستجو رکھیں۔ ان کا مزید کہنا تھا کہ پبلک پرائیویٹ پارٹنرشپ کامیابی سے جاری ہے اور پاکستان تیزی سے اے آئی ورلڈ کی طرف بڑھ رہا ہے۔

پاکستان میں نئے گیس کنکشنز پر عائد پابندی ختم کرنے کے لیے پٹرولیم ڈویژن نے وفاقی کابینہ کو سمری بھیج دی ہے۔ ذرائع کے مطابق ابتدائی طور پر ایک لاکھ 20 ہزار نئے کنکشن فراہم کیے جائیں گے اور ان درخواست گزاروں کو ترجیح دی جائے گی جنہیں پہلے ڈیمانڈ نوٹس جاری ہو چکے یا جنہوں نے ایمرجنسی فیس جمع کرائی مگر پابندی کے باعث کنکشن حاصل نہ کرسکے۔ پاکستان اندازاً ڈھائی لاکھ سے زائد افراد اس زمرے میں آتے ہیں، تاہم انہیں اس بات کا حلف دینا ہوگا کہ وہ پرانے دعوؤں یا کنکشن فیس میں اضافے کے خلاف عدالت سے رجوع نہیں کریں گے۔ اس وقت ملک میں گیس کمپنیوں کے پاس تقریباً 35 لاکھ نئی درخواستیں زیر التوا ہیں۔

اطلاعات کے مطابق نئے کنکشنز کی فیس 40 ہزار سے 50 ہزار روپے مقرر کی جائے گی جبکہ صارفین کو نوٹیفائیڈ ری گیسیفائیڈ لیکویفائیڈ نیچرل گیس (آر ایل این جی) کے نرخ پر بل جاری ہوگا جو فی الوقت 3 ہزار 200 روپے فی ایم ایم بی ٹی یو ہے۔ جی ایس ٹی سمیت یہ قیمت 3 ہزار 900 سے 4 ہزار روپے فی ایم ایم بی ٹی یو تک پہنچ جائے گی۔ رپورٹ کے مطابق، نئے کنکشنز دینے کی تجویز اس لیے بھی دی گئی ہے تاکہ نیٹ ورک میں موجود اضافی گیس کو استعمال کیا جا سکے جو پائپ لائن سسٹم اور ریاستی معاہدوں کے لیے خطرہ بن رہی ہے۔