پاکستان میں سونا مہنگا ہونے کا سلسلہ جاری ہے، ملکی تاریخ میں فی تولہ سونے کی قیمت ایک نئی بلند ترین سطح پر پہنچ گئی۔

آل پاکستان جیمز اینڈ جیولرز ایسوسی ایشن کے مطابق عالمی اور مقامی گولڈ مارکیٹس میں سونے کی قیمتوں میں ریکارڈ اضافہ دیکھنے میں آ رہا ہے۔ آج مقامی مارکیٹ میں 24 قیراط فی تولہ سونا 6900 روپے مہنگا ہوکر 4 لاکھ 35 ہزار 100 روپے کا ہوگیا۔

اسی طرح دس گرام سونا 5916 روپے بڑھ کر 3 لاکھ 73 ہزار 28 روپے کا ہو گیا۔ دوسری جانب چاندی کی فی تولہ قیمت 5247 روپے کی ریکارڈ سطح پر برقرار ہے۔

ماہرین کے مطابق عالمی مارکیٹ میں سرمایہ کاروں کی بڑھتی دلچسپی اور معاشی غیر یقینی کی صورتحال سونے کی قیمتوں کو اوپر لے جا رہی ہے۔

انٹرنیشنل گولڈ مارکیٹ میں بھی فی اونس سونا 69 ڈالر مہنگا ہو کر 4140 ڈالر کا ہو گیا۔ تجزیہ کاروں کا کہنا ہے کہ اگر یہی رجحان برقرار رہا تو آئندہ دنوں میں مقامی مارکیٹ میں سونے کی قیمت مزید بڑھ سکتی ہے۔

صرافہ مارکیٹ کے ماہرین کا کہنا ہے کہ عالمی معاشی بحران، ڈالر کی قدر اور مہنگائی کے دباؤ کے باعث پاکستان میں سونا مہنگا ہونا ناگزیر ہے۔ تاہم خریداروں کے لیے یہ صورتحال تشویش کا باعث بن چکی ہے کیونکہ شادیوں کے موسم میں زیورات کی قیمتیں پہنچ سے باہر ہوتی جا رہی ہیں۔

ایف بی آر انکم ٹیکس گوشوارے جمع کرانے کی ڈیڈ لائن میں مزید توسیع نہ دینے کا حتمی فیصلہ کرلیا گیا ہے۔ فیڈرل بورڈ آف ریونیو (ایف بی آر) کے مطابق سال 2025 کے ٹیکس گوشوارے جمع کرانے کا آج آخری روز ہے، جس کے بعد نان فائلرز کے خلاف بڑے پیمانے پر کارروائی کا آغاز کیا جائے گا۔

حکام کے مطابق ایف بی آر کی سوشل میڈیا مانیٹرنگ ٹیم نے اہم ڈیٹا جمع کرلیا ہے اور اب نوٹس بھیجنے کی تیاری مکمل کر لی گئی ہے۔ سوشل میڈیا پر دولت کی نمود و نمائش کرنے والے افراد کے گرد گھیرا تنگ کیا جا رہا ہے۔ قیمتی گاڑیاں، جائیدادیں، زیورات اور مہنگے لباس دکھانے والے افراد کے خلاف سخت کارروائی متوقع ہے۔

مزید یہ کہ ڈیبٹ اور کریڈٹ کارڈ کے ذریعے مہنگی شاپنگ کرنے، بیرونی دوروں کی تصاویر شیئر کرنے، اور شادی کی تقریبات میں نوٹ نچھاور کرنے والے بھی ایف بی آر کے ریڈار پر آ گئے ہیں۔

ایف بی آر حکام کے مطابق ڈیڈ لائن کے بعد پہلے مرحلے میں بڑے نان فائلرز کے خلاف ایکشن لیا جائے گا۔ ان میں مہنگے بنگلوں، فلیٹس، فارم ہاؤسز اور کمرشل جائیدادوں کے مالکان شامل ہوں گے۔ ایسے تمام افراد کو فوری طور پر انکم ٹیکس ریٹرن جمع کرانے کی ہدایت کی گئی ہے۔

ترجمان ایف بی آر نے کہا کہ تاخیر سے گوشوارے جمع کرانے والے افراد لیٹ کیٹگری میں شامل کیے جائیں گے اور انہیں اضافی ٹیکس ادا کرنا پڑے گا۔
ذرائع کے مطابق ایف بی آر کا ہدف ٹیکس نیٹ کو بڑھانا اور پوش طبقے میں ٹیکس کلچر کو فروغ دینا ہے تاکہ قومی معیشت کو مستحکم بنایا جا سکے۔