news
ثناء یوسف قتل کیس: قاتل عمر حیات کے خلاف چالان پراسیکیوشن کو جمع
اسلام آباد کی ڈسٹرکٹ اینڈ سیشن کورٹ میں 17 سالہ ٹک ٹاکر ثناء یوسف کے قتل کیس میں اہم پیشرفت سامنے آئی ہے، جہاں پولیس نے مرکزی ملزم عمر حیات کے خلاف چالان پراسیکیوشن برانچ میں جمع کرا دیا ہے۔ رپورٹ کے مطابق، چالان میں عمر حیات کو قاتل نامزد کرتے ہوئے اس کے 164 کے تحت ریکارڈ شدہ اعترافی بیان کا بھی حوالہ دیا گیا ہے۔ چالان کی جانچ پڑتال پراسیکیوشن کی دو رکنی ٹیم، راجہ نوید کیانی اور محمد عدنان، کرے گی۔ اسکروٹنی مکمل ہونے کے بعد چالان عدالت میں جمع کرایا جائے گا جس کے بعد کیس کی سماعت اور ٹرائل کا باقاعدہ آغاز متعلقہ جج کے روبرو ہوگا۔ یاد رہے کہ نوجوان ملزم عمر حیات نے ثناء یوسف کو دوستی سے انکار پر گھر میں گھس کر فائرنگ کر کے قتل کر دیا تھا، جس پر ملک بھر میں افسوس اور غم و غصے کا اظہار کیا گیا تھا۔