ترجمان دفتر خارجہ: صدر ٹرمپ کے پاکستان دورے سے متعلق کوئی اطلاع نہیں

اسلام آباد:
ترجمان دفتر خارجہ شفقت علی خان نے امریکی صدر ڈونلڈ ٹرمپ کے دورہ پاکستان سے متعلق خبروں پر ردِعمل دیتے ہوئے لاعلمی کا اظہار کیا ہے۔ امریکی خبررساں ادارے رائٹرز سے گفتگو میں ترجمان دفتر خارجہ کا کہنا تھا کہ ہمیں باضابطہ طور پر کوئی اطلاع موصول نہیں ہوئی کہ صدر ٹرمپ ستمبر میں پاکستان کا دورہ کریں گے۔

دوسری جانب خبر ایجنسی رائٹرز کا کہنا ہے کہ امریکی صدر 17 سے 19 ستمبر کے درمیان برطانیہ کا دورہ کریں گے، جس کی تصدیق برطانوی رائل پیلس کی جانب سے بھی کر دی گئی ہے۔ امریکی صدر کو یہ دورہ کنگ چارلس کی دعوت پر کرنا ہے۔

یاد رہے کہ اس سے قبل ذرائع کے حوالے سے خبریں سامنے آئی تھیں کہ صدر ڈونلڈ ٹرمپ 18 ستمبر کو پاکستان کے دورے پر اسلام آباد پہنچیں گے۔ اطلاعات کے مطابق ان کے جنوبی ایشیا کے دورے میں بھارت بھی شامل تھا، جہاں وہ پاکستان سے پہلے یا بعد میں جائیں گے۔

ذرائع کا یہ بھی کہنا تھا کہ صدر ٹرمپ دورہ پاکستان کے دوران صدر مملکت آصف علی زرداری، وزیر اعظم شہباز شریف، اور فیلڈ مارشل و آرمی چیف سید عاصم منیر سمیت اہم شخصیات سے ملاقاتیں کریں گے۔

حال ہی میں صدر ٹرمپ نے فیلڈ مارشل عاصم منیر کے اعزاز میں وائٹ ہاؤس میں ایک ظہرانہ بھی دیا تھا، جہاں دونوں رہنماؤں کی ملاقات ہوئی تھی۔ صدر ٹرمپ نے بھارت سے ممکنہ جنگ روکنے پر عاصم منیر کا شکریہ ادا کیا تھا اور انہیں ایک متاثر کن شخصیت قرار دیا تھا۔