news
پاکستان اسٹاک ایکسچینج میں زبردست تیزی
پاکستان اسٹاک ایکسچینج میں جمعرات کے روز زبردست تیزی دیکھی گئی، جس کے نتیجے میں کے ایس ای 100 انڈیکس نے نئی تاریخ رقم کر دی۔ پاکستان اسٹاک ایکسچینج کاروبار کا آغاز ہی 932 پوائنٹس کی تیزی سے ہوا، جس سے انڈیکس 1,37,312 پوائنٹس پر پہنچ گیا۔ مارکیٹ میں دن بھر تیزی کا رجحان غالب رہا، اور سرمایہ کاروں کے اعتماد کی بحالی کے باعث انڈیکس میں مجموعی طور پر 1,728 پوائنٹس کا اضافہ ریکارڈ کیا گیا۔ اس شاندار اضافے کے ساتھ 100 انڈیکس 1,38,108 پوائنٹس کی نئی بلند ترین سطح پر پہنچ گیا۔ یاد رہے کہ گزشتہ ہفتے بھی اسٹاک مارکیٹ نے نئے ریکارڈ قائم کیے تھے، اور رواں ہفتے بھی مارکیٹ میں مسلسل مثبت رجحان دیکھا جا رہا ہے، جس سے کاروباری سرگرمیوں میں نمایاں اضافہ ہوا ہے۔