news
راہول فاضلپوریہ پر قاتلانہ حملہ، تحقیقات جاری
بھارتی گلوکار اور سابق لوک سبھا امیدوار راہول فاضلپوریہ پر قاتلانہ حملہ کیا گیا ہے جس سے بھارت کی شوبز اور سیاسی حلقوں میں تشویش کی لہر دوڑ گئی ہے۔ بھارتی میڈیا رپورٹس کے مطابق یہ واقعہ گروگرام کے سیکٹر 71 میں سدرن پیریفرل روڈ (SPR) پر پیش آیا جہاں راہول فاضلپوریہ کی گاڑی پر فائرنگ کی گئی۔ پولیس نے اطلاع ملنے پر فوری طور پر کارروائی کرتے ہوئے جائے وقوعہ سے شواہد اکٹھے کیے جن میں گولی کا نشان اور ایک مشتبہ کار شامل ہے۔ پولیس حکام کے مطابق ملزم کی شناخت بھی کر لی گئی ہے اور واقعے کی باقاعدہ ایف آئی آر درج کر کے تفتیش شروع کر دی گئی ہے۔ گروگرام پولیس کے پی آر او سندیپ کمار نے میڈیا کو بتایا کہ پیر کی رات فائرنگ کی اطلاع پر ٹیم موقع پر پہنچی اور ابتدائی تحقیقات میں گولی چلنے کی تصدیق ہوئی۔ واضح رہے کہ راہول فاضلپوریہ نے 2024 کے بھارتی عام انتخابات میں جن نائک جنتا پارٹی (JJP) کے پلیٹ فارم سے گروگرام کی نشست پر الیکشن لڑا تھا، تاہم وہ بھارتیہ جنتا پارٹی (BJP) کے امیدوار راؤ اندرجیت سنگھ سے شکست کھا گئے تھے۔ راہول فاضلپوریہ کو بالی ووڈ کے مقبول گانے “لڑکی بیوٹی فل” سے شہرت ملی تھی۔