news
ہیری پوٹر کی نئی ٹی وی سیریز کی پروڈکشن کا آغاز، 2027 میں ریلیز متوقع
دنیا بھر میں مقبول سائنس فکشن فلم سیریز “ہیری پوٹر” کے مداحوں کے لیے بڑی خوشخبری ہے کہ اس کی نئی ٹی وی سیریز کی پروڈکشن کا باضابطہ آغاز کر دیا گیا ہے۔ ایچ بی او کی اس نئی پیشکش کی عکس بندی وارنر برادرز اسٹوڈیوز، لیوزڈن برطانیہ میں شروع ہو چکی ہے، جس کا شائقین کو طویل عرصے سے بےچینی سے انتظار تھا۔ حال ہی میں جاری کردہ ایک مختصر جھلک میں نئے چائلڈ اداکار ڈومینک میک لافلن کو پوٹر کے مشہور کردار میں دکھایا گیا ہے، جو کہ گول چشمہ، ہاگ وارٹس یونیفارم اور پیشانی پر بجلی کے نشان کے ساتھ بالکل اسی انداز میں نظر آتے ہیں جس سے شائقین کو ماضی کے ہیری پوٹر یعنی ڈینیئل ریڈکلف کی یاد آ گئی۔ یہ نئی سیریز جے کے رولنگ کے مشہور ناولوں پر مبنی ہے اور توقع کی جا رہی ہے کہ اسے 2027 میں ریلیز کیا جائے گا۔ پروڈکشن کے آغاز اور ابتدائی مناظر کی ریلیز کے بعد دنیا بھر میں ہیری پوٹر کے مداحوں میں جوش و خروش کی نئی لہر دوڑ گئی ہے۔