news
عمران خان نے آزادی کی بجائے قید کو چُنا، قاسم خان کا جذباتی بیان
تحریک انصاف کے بانی عمران خان کے صاحبزادے قاسم خان نے ایک جذباتی بیان میں کہا ہے کہ ان کے والد کو یہ موقع دیا گیا تھا کہ وہ انگلینڈ میں اپنے اہلِ خانہ کے ساتھ آرام دہ زندگی گزاریں، لیکن عمران خان نے ایک تاریک قید خانے میں قید رہنے کو ترجیح دی۔ قاسم خان نے کہا کہ ان کے والد نے اپنی زندگی کا زیادہ تر حصہ پاکستان کے لیے وقف کر دیا، وہ ہم سے دور رہے، لیکن وہ ہمیشہ ایک رہنما کی حیثیت سے قوم کے ساتھ کھڑے رہے۔ انہوں نے پاکستان کو ہسپتال، یونیورسٹیاں اور ایک انصاف کی تحریک دی۔ قاسم نے مزید کہا کہ ان کے والد ہر روز اُن کے ساتھ ایک باپ کے طور پر موجود نہیں تھے، لیکن اُنہوں نے ایک کرپٹ نظام کے خلاف ڈٹ کر مقابلہ کیا۔ انہیں پیشکش کی گئی کہ وہ انگلینڈ میں سکون سے زندگی گزاریں، اہلخانہ کے ساتھ چہل قدمی کریں یا کرکٹ کھیلیں، مگر انہوں نے یہ سب چھوڑ کر پاکستان کے لیے قربانی کو ترجیح دی۔ قاسم خان نے اپنے والد کو پاکستان کی عوام کی طاقت قرار دیا اور ان کی رہائی کی جدوجہد کے لیے پاکستان آنے کے عزم کا اظہار بھی کیا۔