پی ٹی آئی کا مشاورتی اجلاس، لاہور روانگی پر بیرسٹر گوہر اور قیادت کا مؤقف

پاکستان تحریک انصاف کے چیئرمین بیرسٹر گوہر نے واضح کیا ہے کہ پارٹی کی لاہور روانگی کا مقصد صرف ایک مشاورتی اجلاس ہے، نہ کہ کوئی جلسہ یا احتجاج۔ خیبرپختونخوا ہاؤس اسلام آباد میں میڈیا سے گفتگو کرتے ہوئے ان کا کہنا تھا کہ تحریک انصاف پرامن سیاسی جماعت ہے اور اس کی موجودہ تحریک کا واحد مقصد بانی پی ٹی آئی عمران خان کی رہائی ہے۔ ان کا کہنا تھا کہ ہم پرامن شہری ہیں اور انتشار کی سیاست نہیں کرتے، اس لیے گرفتاریوں کا کوئی امکان نہیں۔

اس موقع پر پی ٹی آئی کے سیکرٹری جنرل سلمان اکرم راجہ نے بھی گفتگو کرتے ہوئے کہا کہ پارٹی رہنماؤں کی لاہور روانگی احتجاج کے لیے نہیں بلکہ پارٹی معاملات پر مشاورت کے لیے ہے، جس کے بعد وہ جلد واپس آ جائیں گے۔ پنجاب اسمبلی میں اپوزیشن لیڈر ملک احمد خان بھچر بھی خیبرپختونخوا ہاؤس اسلام آباد پہنچے، جہاں انہوں نے پارٹی کی مرکزی قیادت سے اہم مشاورت کی۔

تحریک انصاف نے آج خیبرپختونخوا ہاؤس پنجاب اور لاہور میں مشترکہ پارلیمانی پارٹی کا اجلاس طلب کر رکھا ہے جس میں قومی و صوبائی اسمبلیوں کے تمام منتخب اراکین کو مدعو کیا گیا ہے۔ اجلاس کا مقصد موجودہ سیاسی حالات کا جائزہ لیتے ہوئے احتجاجی تحریک کے آئندہ مرحلے کی حکمت عملی طے کرنا ہے۔ ذرائع کے مطابق اجلاس میں ایم این ایز، ایم پی ایز اور پارٹی قیادت شرکت کرے گی اور ان سے تجاویز بھی لی جائیں گی تاکہ تحریک کو مزید مؤثر اور منظم کیا جا سکے۔

اجلاس کے بعد پی ٹی آئی رہنما علی امین گنڈاپور کی قیادت میں ایک قافلہ خیبرپختونخوا ہاؤس سے لاہور روانہ ہو چکا ہے، جہاں ان کی اپوزیشن لیڈر ملک احمد خان بھچر سمیت دیگر پارٹی رہنماؤں سے ملاقاتیں متوقع ہیں۔ لاہور میں قیام کے دوران پارٹی قیادت آزادی تحریک کے آئندہ مراحل پر تفصیلی غور کرے گی۔ یہ اہم اجلاس ایک ایسے وقت میں ہو رہا ہے جب پی ٹی آئی دوبارہ ملک گیر احتجاجی سرگرمیوں کو منظم کرنے کے لیے سیاسی حکمت عملی پر کام کر رہی ہے۔