اوپن اے آئی اور پرپلیکسیٹی نے گوگل سرچ کو ٹکر

گوگل سرچ کو ایک بڑے چیلنج کا سامنا ہے کیونکہ دو معروف آرٹیفیشل انٹیلیجنس کمپنیاں، اوپن اے آئی اور پرپلیکسیٹی، نئے AI براؤزرز متعارف کرانے جا رہی ہیں۔ یورو نیوز کے مطابق، پرپلیکسیٹی نے بدھ کے روز اعلان کیا کہ اس نے “کامیٹ” کے نام سے ایک نیا سرچ براؤزر متعارف کرایا ہے، جو میک اور ونڈوز صارفین کے لیے تیار کیا گیا ہے۔ یہ براؤزر فی الحال صرف ان افراد کو دستیاب ہے جنہوں نے پرپلیکسیٹی میکس کو سبسکرائب کیا ہوا ہے یا جنہیں نئے پلیٹ فارم کی آزمائش کی دعوت دی گئی ہے۔

کامیٹ براؤزر کی خاص بات یہ ہے کہ اس میں ایک طاقتور AI اسسٹنٹ موجود ہے، جو نہ صرف کلک اور ٹائپنگ جیسے کاموں کو خود انجام دے سکتا ہے بلکہ صارفین کی ای میلز اور کلینڈر کو بھی منظم کرتا ہے اور فیڈ پر اہم خبریں نمایاں کرتا ہے۔ ایک تجربے میں، صارف نے براؤزر سے دو مختلف پکوانوں کے لیے گروسری لسٹ حاصل کی اور ان دونوں کو ایک ساتھ پکانے کی ترکیب بھی پوچھی، جس پر براؤزر نے فوری اور مربوط جواب فراہم کیا۔

دوسری طرف، اوپن اے آئی کی جانب سے بھی ایک نئے براؤزر پر کام جاری ہے، تاہم اس بارے میں ابھی زیادہ معلومات سامنے نہیں آئیں۔ ان دونوں AI براؤزرز کا اعلان ایک ایسے وقت میں سامنے آیا ہے جب گوگل کو دنیا بھر میں قانونی اور ریگولیٹری چیلنجز کا سامنا ہے۔ حال ہی میں یورپی یونین کی عدالت کے ایڈووکیٹ جنرل نے گوگل پر 4.1 ارب یورو کے جرمانے کے خلاف اپیل مسترد کرنے کی سفارش کی ہے، جبکہ امریکہ، جاپان، کینیڈا اور برطانیہ میں بھی گوگل کے خلاف اجارہ داری قائم کرنے کے الزامات کی تحقیقات جاری ہیں۔

یہ پیش رفت اس بات کی طرف اشارہ کرتی ہے کہ گوگل سرچ کو مستقبل میں AI پر مبنی نئے پلیٹ فارمز سے سخت مسابقت کا سامنا ہو سکتا ہے۔