سپریم کورٹ کا بڑا فیصلہ: پی ٹی سی ایل کے سابق ملازمین پنشن کے حقدار

اسلام آباد: سپریم کورٹ آف پاکستان نے پی ٹی سی ایل کے سابقہ ملازمین کے پنشن کیس کا فیصلہ سنا دیا، جس میں 200 سے زائد اپیلوں پر مشتمل تفصیلی فیصلے میں انہیں پنشن کا حقدار قرار دے دیا گیا۔ چیف جسٹس یحییٰ آفریدی کی سربراہی میں تین رکنی بینچ نے فیصلہ سنایا، جس میں جسٹس امین الدین خان نے اکثریتی رائے سے فیصلہ دیا جبکہ جسٹس عائشہ ملک نے اختلافی نوٹ تحریر کیا۔

فیصلے میں واضح کیا گیا ہے کہ مالی مسائل کسی ادارے کو پنشن کی ادائیگی سے بری الذمہ نہیں کرتے۔ عدالت نے حکم دیا کہ پی ٹی سی ایل 90 دن کے اندر پنشن کی ادائیگی کا شیڈول مرتب کرے اور تمام ادائیگیاں وفاقی حکومت کی پالیسی کے مطابق کی جائیں۔

سپریم کورٹ نے واضح کیا کہ صرف وہ سابق ملازمین جو وی ایس ایس (رضاکارانہ ریٹائرمنٹ اسکیم) میں شامل نہیں ہوئے، پنشن کے حقدار ہوں گے۔ فیصلے میں کہا گیا ہے کہ پنشن کی ادائیگی کا عمل شفاف، منصفانہ اور مؤثر ہونا چاہیے تاکہ برسوں سے رکے ہوئے مطالبات کا ازالہ کیا جا سکے۔

یہ فیصلہ ایسے وقت سامنے آیا ہے جب اس سے قبل لاہور ہائیکورٹ نے بھی پی ٹی سی ایل کے 40 ہزار ملازمین کی تنخواہیں اور مراعات بحال کرنے کا حکم دیا تھا اور عمل درآمد نہ ہونے پر توہین عدالت کیس کی سماعت کی جا رہی تھی۔ لاہور ہائیکورٹ کے جسٹس ساجد محمود سیٹھی نے پی ٹی سی ایل حکام کو ایک ماہ میں مکمل عملدرآمد کا حکم دیا تھا۔

سپریم کورٹ کے اس فیصلے کو پی ٹی سی ایل پنشنرز کے لیے بڑی قانونی فتح قرار دیا جا رہا ہے، جو کئی سالوں سے پنشن کے حق کے لیے عدالتوں سے رجوع کیے ہوئے تھے۔ اب ان کے لیے امید کی کرن روشن ہوئی ہے کہ وہ اپنی زندگی کے اس اہم مرحلے میں مالی تحفظ حاصل کر سکیں گے۔