رانا ثناء اللہ: پیپلزپارٹی کابینہ میں شامل نہیں ہو رہی

وفاقی مشیر برائے سیاسی امور رانا ثناء اللہ نے کہا ہے کہ پیپلزپارٹی کو وفاقی کابینہ میں شامل ہونے پر کوئی دباؤ نہیں، اور نہ ہی پیپلزپارٹی کی ایسی کوئی خواہش ہے۔ ان کا کہنا تھا کہ موجودہ حکومتی نظام جب تک چلے گا، وہ اسی انتظامی ترتیب کے تحت چلایا جائے گا۔ ان خیالات کا اظہار انہوں نے ہم نیوز کے پروگرام میں گفتگو کرتے ہوئے کیا۔

انہوں نے صدر مملکت کی تبدیلی سے متعلق گردش کرنے والی خبروں کو غیر سنجیدہ قرار دیتے ہوئے کہا کہ ایسی خبروں کی باقاعدہ تردید کی کوئی ضرورت نہیں، صرف اتنا کہنا کافی ہے کہ خبر غلط ہے۔ رانا ثناء اللہ نے واضح کیا کہ انہیں اس بات میں کسی غیرملکی سازش یا بیرونی ہاتھ کا کوئی دخل نظر نہیں آتا۔ ان کے بقول اس قسم کی خبروں کو اتنا سنجیدہ لینا ہی غلط ہے۔

دوسری جانب سابق وزیراعظم شاہد خاقان عباسی نے ملک میں جاری سیاسی انتشار اور معاشی مسائل پر بات کرتے ہوئے کہا کہ اس وقت ملک میں کوئی مؤثر نظام یا پالیسی موجود نہیں ہے، جس کے نتیجے میں غریب عوام مزید پستی میں جا رہے ہیں۔ انہوں نے پی ٹی آئی کی حالیہ تحریک پر تنقید کرتے ہوئے کہا کہ اگر اس تحریک کا مقصد صرف عمران خان کی رہائی ہے تو وہ کبھی کامیاب نہیں ہوگی۔

ان کا کہنا تھا کہ اگر تحریک آئین و قانون کی بالادستی، سیاسی استحکام اور عوامی مسائل کے حل کے لیے چلائی جائے تو اُس میں وزن ہوگا۔ شاہد خاقان عباسی نے پی ٹی آئی کو مشورہ دیا کہ وہ پہلے خیبرپختونخوا میں اپنی حکومت پر توجہ دے، کیونکہ وہ وہاں بھی ناکامی کا شکار ہے، اور اپوزیشن کا مؤثر کردار بھی ادا نہیں کر پا رہی۔ انہوں نے کہا کہ عوام یہ ضرور پوچھیں گے کہ اگر آپ تحریک کے ذریعے اقتدار میں آئے تو ہمیں کیا دیں گے؟ اور فی الحال اس سوال کا جواب پی ٹی آئی کے پاس نہیں ہے۔