news
فہد مصطفیٰ کی بچپن کی سندھی ڈرامے کی ویڈیو وائرل
پاکستان شوبز انڈسٹری کے مشہور اداکار اور معروف گیم شو میزبان فہد مصطفیٰ کی بچپن کی ایک نایاب ویڈیو سوشل میڈیا پر تیزی سے وائرل ہو رہی ہے، جس میں وہ سندھی زبان کے ایک ڈرامے میں اداکاری کرتے دکھائی دے رہے ہیں۔ چونکہ سندھی ان کی مادری زبان ہے، اس لیے صرف سات سے آٹھ سال کی عمر میں بھی وہ سندھی مکالمے بخوبی ادا کرتے نظر آتے ہیں۔ ویڈیو وائرل ہونے کے بعد سوشل میڈیا صارفین نے ان کے بچپن کی رنگت اور حالیہ گوری رنگت کے درمیان فرق پر تبصرے شروع کر دیے ہیں۔
کئی صارفین نے دعویٰ کیا ہے کہ فہد نے جلد کی رنگت نکھارنے کے لیے مختلف بیوٹی ٹریٹمنٹس اور انجیکشنز کا سہارا لیا ہے۔ اس حوالے سے فہد مصطفیٰ خود بھی اپنے مشہور ٹی وی شو میں کئی مرتبہ یہ اعتراف کر چکے ہیں کہ انہوں نے گلوٹاتھایون انجیکشنز کا استعمال کیا تاکہ اسکرین پر بہتر نظر آ سکیں۔ گلوٹاتھایون ایک ایسا اینٹی آکسیڈنٹ ہے جو جلد کو صاف اور نکھرا ہوا بنانے، مدافعتی نظام کو بہتر کرنے اور جسم سے زہریلے مادے خارج کرنے میں مدد دیتا ہے، تاہم اس کے مضر اثرات پر بھی مختلف آراء پائی جاتی ہیں۔