ڈونلڈ ٹرمپ کا ایران پر پابندیاں اٹھانے کا عندیہ

امریکی صدر ڈونلڈ ٹرمپ نے ایران پر عائد پابندیاں ختم کرنے کا عندیہ دیتے ہوئے کہا ہے کہ ایران مذاکرات کے لیے تیار ہو چکا ہے اور مذاکرات کا شیڈول بھی طے پا گیا ہے۔ وائٹ ہاؤس میں اسرائیلی وزیراعظم نیتن یاہو کے ساتھ عشائیے پر ملاقات کے دوران ڈونلڈ ٹرمپ نے کہا کہ ان کی کوششوں سے دنیا میں کئی جنگیں روکی گئیں جن میں پاکستان اور بھارت جیسے ایٹمی طاقتوں کے درمیان تجارتی تعاون کے ذریعے کشیدگی میں کمی شامل ہے۔ ٹرمپ نے کہا کہ وہ پرامید ہیں کہ ایران اور اسرائیل کے درمیان ممکنہ جنگ ٹل چکی ہے اور شاید اب ایران پر مزید کسی حملے کی ضرورت نہ پڑے، کیونکہ خطے کے دیگر ممالک سے بھی امریکہ اور اسرائیل کو بھرپور تعاون حاصل ہوا ہے۔

دوسری جانب اسرائیلی وزیراعظم نیتن یاہو نے فلسطینیوں سے متعلق گفتگو کرتے ہوئے کہا کہ امریکہ اور اسرائیل دیگر ممالک کے ساتھ مل کر ایسے حل کی تلاش میں ہیں جس سے فلسطینیوں کو بہتر مستقبل مل سکے۔ ان کا کہنا تھا کہ اگر فلسطینی غزہ میں رہنا چاہیں تو رہ سکتے ہیں، لیکن اگر جانا چاہیں تو انہیں موقع ملنا چاہیے۔ انہوں نے بتایا کہ اسرائیل ان ممالک سے قریبی تعاون کر رہا ہے جو فلسطینیوں کو نئے مواقع فراہم کرنے کی حمایت کرتے ہیں۔ نیتن یاہو نے مزید کہا کہ اسرائیل ان فلسطینی ہمسایوں کے ساتھ امن قائم کرنے کا خواہاں ہے جو اسرائیل کی تباہی کے خواہش مند نہیں، اور ایسا امن چاہتے ہیں جس میں اسرائیل کی سیکیورٹی مکمل طور پر اس کے اپنے اختیار میں ہو۔