لاہور: کمسن ڈرائیور اور موٹر سائیکل ریسنگ سے دو ہلاکتیں

لاہور کے علاقے شاہدرہ ٹاؤن میں ایک افسوسناک ٹریفک حادثہ اس وقت پیش آیا جب 13 سالہ کمسن حاشر نامی لڑکا تیز رفتار کار چلاتے ہوئے قابو نہ رکھ سکا اور تین موٹرسائیکل سواروں کو ٹکر مار دی۔ لاہور حادثے کے نتیجے میں ایک شخص موقع پر ہی جاں بحق ہو گیا، جبکہ پانچ افراد زخمی ہوئے، جنہیں فوری طور پر ہسپتال منتقل کر دیا گیا۔ پولیس کے مطابق حادثے کا سبب بننے والے کمسن ڈرائیور کو موقع پر موجود شہریوں نے پکڑ کر پولیس کے حوالے کیا، جبکہ گاڑی کو بھی تحویل میں لے لیا گیا ہے۔

پولیس کا کہنا ہے کہ واقعے کی تحقیقات جاری ہیں اور بچے کے والدین سے بھی پوچھ گچھ کی جا رہی ہے۔ شہری حلقوں میں کمسن بچوں کو گاڑیاں چلانے کی اجازت دینے پر شدید تشویش پائی جاتی ہے، اور عوامی مطالبہ ہے کہ ایسے واقعات کی روک تھام کے لیے سخت قانونی اقدامات کیے جائیں تاکہ مستقبل میں ایسے سانحات سے بچا جا سکے۔

دریں اثناء کراچی کی مصروف شاہراہ فیصل پر دو موٹر سائیکلوں کے درمیان ریس لگانے کے دوران تصادم ہوا، جس میں ایک نوجوان جاں بحق اور دوسرا زخمی ہو گیا۔ پولیس کے مطابق دونوں موٹر سائیکل سوار تیز رفتاری سے شاہراہ فیصل پر ریس لگا رہے تھے کہ اچانک ٹکرا گئے۔ حادثے کے بعد دونوں زخمیوں کو فوری طور پر اسپتال منتقل کیا گیا، جہاں ایک نوجوان زخموں کی تاب نہ لاتے ہوئے چل بسا۔ حکام کے مطابق جاں بحق اور زخمی افراد کی شناخت کا عمل جاری ہے۔

ٹریفک قوانین کی خلاف ورزی، کم عمری میں ڈرائیونگ اور غیر قانونی ریسنگ کے بڑھتے واقعات شہری زندگیوں کو خطرے میں ڈال رہے ہیں، جس پر قابو پانے کے لیے فوری اقدامات ناگزیر ہیں۔