یوم عاشور: وزیراعظم اور وزیر داخلہ نے سیکیورٹی اداروں کو سراہا

وزیراعظم شہباز شریف نے کہا ہے کہ یوم عاشور کا پُرامن اور پُرسکون انعقاد صوبائی حکومتوں اور سیکیورٹی فورسز کی مؤثر اور پیشہ ورانہ منصوبہ بندی کا نتیجہ ہے۔ انہوں نے وفاقی وزیر داخلہ محسن نقوی سے ملاقات کے دوران عاشورہ کے انتظامات پر بریفنگ لی اور ان کی قیادت میں کیے گئے اقدامات کو سراہا۔ وزیراعظم نے پنجاب کی وزیر اعلیٰ مریم نواز، سندھ کے وزیر اعلیٰ مراد علی شاہ، خیبرپختونخوا کے وزیر اعلیٰ علی امین گنڈاپور، بلوچستان کے وزیر اعلیٰ میر سرفراز بگٹی، گلگت بلتستان کے وزیر اعلیٰ گلبر خان اور آزاد کشمیر کے وزیراعظم چوہدری انوار الحق کو بھی مؤثر سیکیورٹی انتظامات پر خراج تحسین پیش کیا۔

وفاقی وزیر داخلہ محسن نقوی نے کہا کہ عاشورہ کا پُرامن انعقاد قومی یکجہتی اور سیکیورٹی فورسز کی مثالی کارکردگی کا مظہر ہے۔ انہوں نے اسلام آباد سمیت چاروں صوبوں، گلگت بلتستان اور آزاد کشمیر میں جلوسوں اور مجالس کے بخیر و عافیت اختتام پذیر ہونے پر اطمینان کا اظہار کیا۔

انہوں نے فوج، رینجرز، پولیس، انتظامیہ اور دیگر سیکیورٹی اداروں کی محنت، پیشہ ورانہ طرز عمل اور مثالی نظم و ضبط کو سراہا اور کہا کہ ہر جوان، افسر اور اہلکار کا دل کی گہرائی سے شکریہ ادا کرتا ہوں جنہوں نے اپنی جانفشانی سے فرائض انجام دیے اور عزاداروں کو فول پروف سیکیورٹی فراہم کی۔

محسن نقوی نے علمائے کرام کے کردار کو بھی قابل تحسین قرار دیا اور کہا کہ بھائی چارے، مذہبی ہم آہنگی اور بین المسالک اتحاد کے فروغ میں علما نے کلیدی کردار ادا کیا۔ انہوں نے کہا کہ تمام فورسز اور فیلڈ فارمیشنز نے دن رات ایک کرکے محرم الحرام کے ایّام بخیر و عافیت مکمل کیے، اور ہم اللہ تعالیٰ کے شکر گزار ہیں کہ یہ عظیم فریضہ بخوبی سرانجام پایا۔