وزیراعلیٰ علی امین گنڈاپور کا گورنر پر سخت وار، “چمادھا” قرار دے دیا

وزیراعلیٰ خیبرپختونخوا علی امین گنڈاپور نے صوبے کے گورنر فیصل کریم کنڈی پر سخت تنقید کرتے ہوئے کہا ہے کہ گورنر کی کوئی سیاسی حیثیت نہیں، وہ تو کونسلر کی سیٹ بھی نہیں جیت سکتے، ایسے شخص کو صوبائی حکومت گرانے کا کوئی اختیار نہیں۔ میڈیا سے گفتگو میں علی امین گنڈاپور نے گورنر کو طنزیہ انداز میں ’چمادھا‘ قرار دے کر کہا کہ وہ محض نمائشی کردار ادا کر رہے ہیں اور خیبرپختونخوا حکومت کو کوئی خطرہ لاحق نہیں۔ وزیراعلیٰ کا کہنا تھا کہ عوام نے پی ٹی آئی پر اعتماد کیا ہے اور وہ عوام کے حقوق کا دفاع جاری رکھیں گے۔ سانحہ سوات کے حوالے سے ان کا کہنا تھا کہ حکومت کی پالیسی بالکل واضح ہے، جس کسی کی بھی کوتاہی ثابت ہوئی اُسے سزا دی جائے گی، چاہے وہ کتنا ہی بااثر شخص کیوں نہ ہو۔ قبل ازیں پشاور ہائی کورٹ میں ان کی حفاظتی ضمانت میں توسیع کی درخواست پر سماعت ہوئی جس میں وہ خود عدالت میں پیش ہوئے۔ وکلا نے عدالت کو بتایا کہ وزیراعلیٰ کے خلاف نیب اور اینٹی کرپشن سمیت مختلف اداروں میں مقدمات درج ہیں لیکن ان کی تفصیلات فراہم نہیں کی گئیں۔ عدالت نے دلائل سننے کے بعد حفاظتی ضمانت میں توسیع منظور کرتے ہوئے تمام متعلقہ اداروں کو مقدمات کی تفصیلات فراہم کرنے اور وزیراعلیٰ کو کسی بھی مقدمے میں گرفتار نہ کرنے کا حکم دے دیا۔