بھارت میں پاکستانی یوٹیوبرز اور فنکاروں پر پابندی اچانک ختم

بھارت میں پاکستانی یوٹیوبرز اور فنکاروں پر عائد کی گئی پابندیوں کو اچانک ختم کر دیا گیا ہے، جس کے بعد بھارتی شائقین ایک بار پھر پاکستانی مواد تک رسائی حاصل کر رہے ہیں۔ یہ پابندیاں پہلگام واقعے کے بعد لگائی گئی تھیں، جس دوران فواد خان اور ہانیہ عامر سمیت متعدد پاکستانی فنکاروں کے سوشل میڈیا اکاؤنٹس اور فلمی ریلیزز کو بھی محدود کر دیا گیا تھا۔ تاہم اب بھارت حکومت نے بغیر کسی پیشگی اعلان کے یوٹیوب چینلز کو بحال کر دیا ہے، جس پر بھارتی ناظرین نے خوشی کا اظہار کیا ہے۔ اگرچہ پابندی کے دوران پاکستانی ڈراموں کی ویورشپ میں کمی دیکھنے میں آئی، تاہم “من مست ملنگ”، “شیر”، “ڈائن” اور “پرورش” جیسے ڈرامے بھارتی ناظرین کو اپنی طرف متوجہ کرتے رہے۔

پابندی ختم ہونے پر سوشل میڈیا پر بھارتی صارفین کی جانب سے ملا جلا ردعمل سامنے آیا۔ کچھ صارفین نے اسے دلجیت دوسانجھ جیسے فنکاروں کی کوششوں کا نتیجہ قرار دیا جبکہ کچھ نے پاکستانی انڈسٹری کو بہتر مواد کی تیاری پر زور دیا۔ اداکار دانش تیمور کے مداح بھی اس فیصلے پر کافی پرجوش نظر آئے، خاص طور پر ان کے مقبول ڈرامے “شیر” کی بڑھتی ہوئی مقبولیت کو مدنظر رکھتے ہوئے۔ سوشل میڈیا پر ایک صارف نے لکھا کہ “اب شیر مزید دھاڑے گا” اور کچھ نے اسے “تیرے بن” کا ریکارڈ توڑنے والا ڈرامہ قرار دیا۔

دلچسپ بات یہ رہی کہ کئی بھارتی صارفین اس وقت حیران رہ گئے جب انہوں نے اپنی ٹائم لائن پر پاکستانی فنکاروں کی پوسٹس دوبارہ دیکھیں، جس سے پتہ چلا کہ کچھ اکاؤنٹس پر عائد پابندی بھی ختم ہو چکی ہے۔ بحال ہونے والے فنکاروں میں دانش تیمور، احد رضا میر، ماورا حسین اور یمنیٰ زیدی شامل ہیں، تاہم ماہرہ خان، فواد خان، وہاج علی، اقرا عزیز، فرحان سعید اور ہانیہ عامر جیسے بڑے ناموں کے اکاؤنٹس تاحال بند ہیں۔

ماہرین کے مطابق یہ قدم ثقافتی تعلقات میں نرمی کا اشارہ ہے اور پاکستانی مواد کی بڑھتی ہوئی مقبولیت اس بات کا ثبوت ہے کہ معیاری اور تخلیقی کام بھارتی ناظرین میں اپنی جگہ بنانے کی بھرپور صلاحیت رکھتا ہے۔ اب یہ پاکستانی انڈسٹری کے لیے ایک سنہری موقع ہے کہ وہ بہتر اور معیاری مواد کے ذریعے بھارتی مارکیٹ میں اپنی موجودگی کو مزید مضبوط بنائے۔