چین میں غیر تصدیق شدہ پاور بینک کی ڈومیسٹک پروازوں میں پابندی

چینی حکام نے لیتھیم بیٹری سے چلنے والے آلات میں آتشزدگی کے بڑھتے ہوئے واقعات کے پیش نظر ملک کی ڈومیسٹک پروازوں میں غیر تصدیق شدہ پاور بینکوں پر پابندی عائد کر دی ہے۔ میڈیا رپورٹس کے مطابق چین کی سول ایوی ایشن ایڈمنسٹریشن نے واضح کیا ہے کہ اب صرف وہی پاور بینک پرواز میں لے جانے کی اجازت ہوگی جو “چائنا کمپلسری سرٹیفیکیشن” یعنی 3C سے تصدیق شدہ ہوں۔ ایسے پاور بینک جن پر لیبلنگ واضح نہ ہو یا جنہیں مینوفیکچررز نے مارکیٹ سے واپس منگوایا ہو، ان پر بھی پابندی لاگو ہو گی۔ یہ اقدام ان بیٹریوں کے زیادہ گرم ہونے اور آگ لگنے کے واقعات میں اضافے کے باعث اٹھایا گیا تاکہ پروازوں کی حفاظت کو یقینی بنایا جا سکے۔

یہ فیصلہ اس وقت سامنے آیا ہے جب دو بڑی کمپنیوں کو اپنے پاور بینک ماڈلز مارکیٹ سے واپس منگوانے پڑے۔ رواں ماہ شینزین کی معروف کمپنی روموس کو اپنے 20,000mAh پاور بینکوں کے 492,000 یونٹس واپس منگوانے کا حکم دیا گیا کیونکہ ملک کی مختلف یونیورسٹیوں نے ان سے منسلک آگ لگنے کے خطرات کی شکایات کی تھیں۔ یہ متاثرہ ماڈلز جون 2023 سے جولائی 2024 کے درمیان تیار کیے گئے تھے۔ اسی طرح ایک عالمی الیکٹرانکس برانڈ “اینکر انوویشنز” نے بھی 20 جون کو ممکنہ آتشزدگی کے خطرات کے باعث دنیا بھر سے اپنے 710,000 پاور بینک یونٹس واپس منگوائے ہیں۔ ان اقدامات سے ظاہر ہوتا ہے کہ چین اب بیٹری سیفٹی کو بہت سنجیدگی سے لے رہا ہے۔