امریکی انفلوئنسر ٹینر مارٹن کا انتقال

امریکہ سے تعلق رکھنے والے 30 سالہ انفلوئنسر ٹینر مارٹن، جنہوں نے پانچ برس قبل اپنی موت کی پیشگوئی کی تھی، طویل کینسر کی جدوجہد کے بعد 25 جون کو انتقال کر گئے۔ ٹینر نے اپنی بیماری کو ایک دستاویزی انداز میں سوشل میڈیا پر بیان کیا، اور اپنی موت کی اطلاع بھی خود ریکارڈ کی گئی ایک ویڈیو کے ذریعے دی، جو اُن کے انسٹاگرام اکاؤنٹ @tannerandshay پر شیئر کی گئی، جسے وہ اپنی اہلیہ شی مارٹن کے ساتھ چلاتے تھے۔ ویڈیو میں ٹینر نے کہا: “ہیلو، یہ میں ہوں، ٹینر۔ اگر آپ یہ دیکھ رہے ہیں، تو میں اب اس دنیا میں نہیں رہا۔”

انفلوئنسر ٹینر مارٹن کو 2020 میں 25 برس کی عمر میں آنتوں کے کینسر کی تشخیص ہوئی تھی، جو کہ 50 سال سے کم عمر افراد میں موت کی سب سے بڑی وجوہات میں شامل ہو چکی ہے۔ ان کے سسر اسٹیو رائٹ نے بتایا کہ وہ یوٹاہ میں اپنے گھر کے بیسمنٹ اپارٹمنٹ میں وفات پا گئے۔ ٹینر کو ایک خوش اخلاق، خیال رکھنے والا انسان قرار دیتے ہوئے انہوں نے خراج تحسین پیش کیا۔

کچھ ہی ہفتے قبل، ٹینر اور ان کی اہلیہ شی نے IVF کے ذریعے 15 مئی کو اپنی بیٹی ایمی لو کو خوش آمدید کہا تھا۔ اپنی آخری ویڈیو میں ٹینر نے اپنے فالوورز کا شکریہ ادا کرتے ہوئے محبت، نرمی اور مثبت رویے کی تلقین کی، جس سے ان کے پیغام میں امید اور انسان دوستی کا پہلو نمایاں رہا۔