ڈونلڈ ٹرمپ کا ایران پر تبصرہ: خامنہ ای کی جان بچائی، جوہری تنصیبات تباہ کیں

سابق امریکی صدر ڈونلڈ ٹرمپ نے ایران سے متعلق اپنے تازہ بیان میں کئی دعوے کرتے ہوئے کہا ہے کہ ایرانی سپریم لیڈر آیت اللہ خامنہ ای نے جنگ جیتنے کا جو دعویٰ کیا وہ سراسر جھوٹ ہے کیونکہ ان کے ملک کو مکمل طور پر تباہ کر دیا گیا۔ڈونلڈ ٹرمپ نے دعویٰ کیا کہ وہ جانتے تھے کہ خامنہ ای کہاں چھپے ہوئے ہیں اور انہوں نے ہی ان کی جان بچائی۔ انہوں نے کہا کہ اسرائیل اور امریکی افواج خامنہ ای کو نشانہ بنانے کے قریب تھیں، لیکن انہوں نے اسرائیلی فضائیہ کو تہران پر بڑے حملے سے پیچھے ہٹنے کا حکم دیا۔ ان کے بقول یہ حملہ انتہائی تباہ کن ہوتا اور ہزاروں ایرانی ہلاک ہو سکتے تھے، لیکن انہوں نے اسے روکا۔

ٹرمپ نے ایرانی قیادت پر تنقید کرتے ہوئے کہا کہ انہوں نے اس اقدام پر شکرگزاری کے بجائے نفرت اور غصے کا مظاہرہ کیا، جبکہ ایران اگر عالمی نظام کا حصہ نہ بنا تو اس کی حالت مزید خراب ہو گی۔ امریکی صدر نے مزید انکشاف کیا کہ وہ ایران سے ملاقات کی تیاری کر رہے ہیں، اور امکان ہے کہ اس ملاقات کے نتیجے میں کوئی معاہدہ یا دستاویز سامنے آ جائے۔ تاہم وائٹ ہاؤس کی جانب سے ملاقات کے مقام یا شرکاء کے بارے میں کوئی تفصیلات جاری نہیں کی گئیں۔

سینئر امریکی اہلکار لیویٹ کے مطابق ان مذاکرات کا اصل مقصد ایران کو یورینیم افزودگی سے باز رکھتے ہوئے ایک غیر افزودہ سول نیوکلیئر پروگرام کی طرف لانا ہے۔ میڈیا رپورٹس کے مطابق ایران کو اقتصادی پابندیاں ختم کرنے اور بیرونی بینکوں میں موجود 6 ارب ڈالر کے استعمال کی اجازت دی جا سکتی ہے۔ مزید برآں، امریکہ اپنے اتحادیوں کے ذریعے ایران کو 20 سے 30 ارب ڈالر کی مالی امداد فراہم کرنے پر غور کر رہا ہے تاکہ وہ ایک پرامن نیوکلیئر توانائی منصوبہ شروع کر سکے۔

ٹرمپ نے اس بات کی بھی تصدیق کی کہ ایران کی تین جوہری تنصیبات کو مکمل طور پر تباہ کیا جا چکا ہے، اور وہ مزید دباؤ کی پالیسی جاری رکھیں گے۔ ان کا کہنا تھا کہ جیسے ہی ہیروشیما اور ناگاساکی پر حملے کے بعد جنگ رک گئی تھی، ویسے ہی ایران پر حملے نے بھی جنگ ختم کر دی۔ ان کا کہنا تھا کہ معاہدہ ہو یا نہ ہو، انہیں فرق نہیں پڑتا، لیکن دنیا پر یہ واضح ہو چکا ہے کہ امریکہ اپنے دشمنوں کو روکنے کی مکمل صلاحیت رکھتا ہے۔